الماتى اۋەجايىنداعى كەپىلگە الۋ ءىسى بويىنشا تىڭ دەرەكتەر شىقتى. قوسىمشا تەرگەۋدەن كەيىن ءىس قايتادان سوتقا جىبەرىلدى، دەپ حابارلايدى Dalanews.kz.
بۇعان دەيىن كۇدىكتى ماشراپبەك باراتوۆتىڭ ادۆوكاتى قىلمىستىق قۇقىقبۇزۋشىلىقتىڭ سارالانۋىمەن كەلىسپەيتىنىن بىلدىرگەن. وسىعان بايلانىستى ءىس پروكۋرورعا قايتارىلعان بولاتىن.
"قوسىمشا سوتقا دەيىنگى تەرگەپ-تەكسەرۋ ناتيجەسىندە باراتوۆ م.ز.-نىڭ ارەكەتىنە بەرىلگەن قۇقىقتىق باعا وزگەرىسسىز قالدى"، – دەلىنگەن رەسمي حابارلامادا.
سونىمەن قاتار، سوتقا دەيىنگى تەرگەۋ بارىسىندا جابىرلەنۋشى رەتىندە قىزدى قۇتقارعان مۇسا ابدرايم تانىلدى.
وسىلايشا، تەرگەۋ اياقتالىپ، ءىس سوتقا جولداندى.
7 ناۋرىز كۇنى الماتى اۋەجايىنىڭ ىشكى رەيستەر تەرمينالىندا 67 جاستاعى ەر ادام تەكسەرۋ قىزمەتىنىڭ قىزمەتكەرىن كەپىلگە الىپ، وعان پىشاقپەن قوقان-لوققى كورسەتكەن. ماشراپبەك باراتوۆقا قاتىستى سوتقا دەيىنگى تەرگەپ-تەكسەرۋ حۋليگاندىق، ادامدى كەپىلگە الۋ جانە تەرروريزم اكتىسى تۋرالى جالعان حابار بەرۋ دەرەكتەرى بويىنشا تىركەلگەن.
