الماتى اۋەجايىندا قاسكوي كەپىلگە العان قىزدىڭ جاعدايى بەلگىلى بولدى، دەپ حابارلايدى Dalanews.kz. 

وسى وقيعادان زارداپ شەككەن اۋەجاي قىزمەتكەرىنە قاتىستى الماتى حالىقارالىق اۋەجايى وعان پسيحولوگ بەرىپ، ءارى قاراي بارلىق قاجەتتى كومەك كورسەتەدى، دەلىنگەن اۋەجاي حابارلاماسىندا. 

ەسكە سالايىق، بۇعان دەيىن الماتىدا ەر ادام اۋەجاي قىزمەتكەرىن كەپىلگە العانىن جازعان ەدىك. 

اۋەجاي وكىلدەرىنىڭ سوزىنشە، وقيعا بۇگىن، 7 ناۋرىزدا اۋەجايدىڭ ۇشۋ الدىنداعى تەكسەرۋ ايماعىندا بولعان.

ساعات 11:45 شاماسىندا ءوزىن جولاۋشى رەتىندە تانىستىرعان ەر ادام ىشكى تەرمينالداعى (ت1) رەيس الدىنداعى تەكسەرۋ ايماعىنا كەلگەن. الماتى حالىقارالىق اۋەجايىنىڭ اۆياسيالىق قاۋىپسىزدىك قىزمەتىنىڭ سكرينينگ قىزمەتكەرلەرى ەر ادامنان قۇجاتتارىن كورسەتۋدى سۇراعان، ءبىراق ەر ادام سكرينينگ وفيسەرىن شاشىنان ۇستاپ الىپ، پىشاقپەن قورقىتا باستاعان.

7 مينۋتتان كەيىن اۋەجايدىڭ جەلىلىك پوليسيا ءبولىمىنىڭ (LPD) قىزمەتكەرلەرى جانە الماتى حالىقارالىق اۋەجايىنىڭ اۆياسيالىق قاۋىپسىزدىك قىزمەتكەرلەرى ەر ادامنىڭ پىشاعىن تارتىپ العان.

قازىرگى ۋاقىتتا ەر ادام پوليسيا بولىمىندە، قۇقىق قورعاۋ قىزمەتكەرلەرى وقيعانىڭ ءمان-جايىن انىقتاپ جاتىر.