بۇگىندە قارقىندى دامۋ جولىنا تۇسكەن الماتى قالاسىنىڭ المالى اۋدانى ءبىرقاتار ەكونوميكالىق كورسەتكىش بويىنشا توپ باستاپ كەلەدى. الماتى قالاسى اكىمى ەربولات دوسايەۆ اۋدان تۇرعىندارىمەن كەزدەسۋدە اۋداننىڭ جەتىستىگىن تۇرعىندارعا سانامالاپ بەردى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.

كەزدەسۋدى اشقان قالا باسشىسى تۇرعىنداردى كەلە جاتقان كونستيتۋسيا كۇنىمەن قۇتتىقتاپ، ەلدىڭ نەگىزگى زاڭى ءاربىر قازاقستاندىق ءۇشىن ماڭىزدى ەكەنىن اتاپ، زور دەنساۋلىق پەن اماندىق تىلەدى.

شاھار باسشىسى اتاپ وتكەندەي، جىل باسىنان بەرى جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 5،3% ءوسىپ، 59 669-عا جەتتى، بۇل 4 مىڭنان استام تۇرعىندى تۇراقتى جۇمىس ورىنمەن قامتاماسىز ەتۋگە مۇمكىندىك بەردى.

ونەركاسىپ ءوندىرىسىنىڭ كولەمى 123،6 ملرد تەڭگە بولىپ، سالىق ءتۇسىمى جىل باسىنان بەرى 16% ءوسىپ، 225 ملرد تەڭگەگە جەتتى. ينۆەستيسيا كولەمى 5% ءوسىپ، 139،4 ملرد تەڭگە بولدى.

اۋدان بيۋدجەتى 2024 جىلى 12،3 ملرد تەڭگەگە ارتتى. 2024 جىلى ماۋسىمدا بيۋدجەت تاعى 16% ۇلعايتىلىپ، 24،7 ملرد تەڭگەگە جەتتى.