الەۋمەتتىك جەلىدە جەدەل جاردەم جۇرگىزۋشىسىن ۇرعان ساقالدى جىگىتتىڭ كەشىرىم سۇراعان ۆيدەوسى تارادى. ساقالىن قىرىپ تاستاعان نۇربولات داكەبايەۆ بۇل ۆيدەونى ۇستالار الدىندا تۇسىرگەن كورىنەدى، دەپ حابارلايدى Dalanews.kz.
– اسسالاۋماعالەيكۇم، بارشا قازاقستاندىقتار، بارشا مۇسىلماندار، قازاق ەلى! مەن 2024 جىلى 1 اقپان كۇنى ءوزىم بارىپ بەرىلمەكشىمىن. سەبەبى ىستەپ قويعان قياناتىم كۇن بەرمەي جاتىر. بارىنەن، اق حالاتتىلاردان كەشىرىم سۇرايمىن. مەن زيان تيگىزبەك ويىم بولعان جوق. ونداي ويىم بولماعان، بولمايدى دا. جاڭاعى قول جۇمساپ، مەنەن ءجابىر كورگەن باۋىرىمنان مەن كەشىرىم سۇرايمىن. اللا رازىلىعى ءۇشىن كەشىرىڭىزدەر. قازاقستانداعى مۇسىلمان باۋىرلار، بارلىقتارىڭىز مەنى كەشىرىپ قويىڭىزدار. ءوز قاتەلىگىمدى ءتۇسىنىپ وتىرمىن، – دەگەن كۇدىكتى داكەبايەۆ.
ايتا كەتەيىك، قاراعاندى تۇرعىنى جەدەل جاردەم جۇرگىزۋشىسىن ۇرىپ-سوققان بولاتىن. تورەعالي ەسىمدى جۇرگىزۋشىنىڭ مۇرنى، قابىرىعاسى سىنىپ، كوزى كورمەي قالعان. پوليسيا قىزمەتكەرلەرى توبەلەسكەن ادامنىڭ كىم ەكەنىن انىقتاپ، كەشە الدەبىر قىستاقتان قولعا ءتۇسىردى.
