Áleýmettik jelide jedel járdem júrgizýshisin urǵan saqaldy jigittiń keshirim suraǵan videosy tarady. Saqalyn qyryp tastaǵan Nurbolat Dákebaev bul videony ustalar aldynda túsirgen kórinedi, dep habarlaidy Dalanews.kz.
– Assalaýmaǵaleikúm, barsha qazaqstandyqtar, barsha musylmandar, Qazaq eli! Men 2024 jyly 1 aqpan kúni ózim baryp berilmekshimin. Sebebi istep qoiǵan qiianatym kún bermei jatyr. Bárinen, aq halattylardan keshirim suraimyn. Men ziian tigizbek oiym bolǵan joq. Ondai oiym bolmaǵan, bolmaidy da. Jańaǵy qol jumsap, menen jábir kórgen baýyrymnan men keshirim suraimyn. Alla razylyǵy úshin keshirińizder. Qazaqstandaǵy musylman baýyrlar, barlyqtaryńyz meni keshirip qoiyńyzdar. Óz qateligimdi túsinip otyrmyn, – degen kúdikti Dákebaev.
Aita keteiik, Qaraǵandy turǵyny jedel járdem júrgizýshisin uryp-soqqan bolatyn. Tóreǵali esimdi júrgizýshinyń murny, qabyryǵasy synyp, kózi kórmei qalǵan. Politsiia qyzmetkerleri tóbelesken adamnyń kim ekenin anyqtap, keshe áldebir qystaqtan qolǵa túsirdi.
