الماتى قالاسىنىڭ تۇزەتىلگەن بيۋدجەتىن 112،2 ملرد تەڭگە سوماسىندا ناقتىلاۋمەن قالالىق ءماسليحاتتىڭ كەزەكتى XIX سەسسياسىندا دەپۋتاتتار قارادى،دەپ حابارلايدى Dalanews.kz. 

مەگاپوليس اكىمىنىڭ ورىنباسارى اسقار ءامرين ايتقانداي، بۇل قارجى مەملەكەت باسشىسىنىڭ تاپسىرمالارىن ورىنداۋ اياسىندا "الماتى قالاسىن دامىتۋدىڭ 2025 جىلعا دەيىنگى باعدارلاماسىندا جانە 2030 جىلعا دەيىنگى ورتا مەرزىمدى پەرسپەكتيۆالاردا" كوزدەلگەن الەۋمەتتىك ماڭىزدى جوبالاردى قاجەتتى قارجىلاندىرۋدى قامتاماسىز ەتۋگە ارنالعان.

قالا اكىمدىگى الەۋمەتتىك ينفراقۇرىلىمدى جاڭعىرتۋ بويىنشا جۇيەلى جۇمىستار جۇرگىزۋدە، دەپ حابارلادى ا. ءامرين.

ناقتىلاۋ شەڭبەرىندە الەۋمەتتىك بلوكتى قارجىلاندىرۋ 31،6 ملرد تەڭگەگە كوبەيدى. ونىڭ ىشىندە دەنساۋلىق ساقتاۋ سالاسىنا قوسىمشا 5،4 ملرد تەڭگە بولىنەدى. بۇل الماتىلىقتار ءۇشىن دەنساۋلىق ساقتاۋ قىزمەتتەرىنىڭ قولجەتىمدىلىگى مەن ساپاسىن ارتتىرۋعا مۇمكىندىك بەرەدى.

"مادەنيەت جانە سپورت سالاسىنا 3،1 ملرد تەڭگە بولىنەدى. قالا اۋداندارىن جاڭا كىتاپحانالارمەن قامتاماسىز ەتۋ، سونداي-اق، ۇلتتىق سپورت تۇرلەرىن دامىتۋ جوسپارلانعان، بۇل قالا تۇرعىندارىنىڭ مادەنيەتى مەن دەنە شىنىقتىرۋ بەلسەندىلىگىن ارتتىرادى"، - دەدى ا.ءامرين.

ونىڭ ايتۋىنشا، تۇرعىن ۇي-كوممۋنالدىق شارۋاشىلىق سالاسىن قارجىلاندىرۋ، سونداي-اق "اقساي" سۋ جيناعىشىن جانە جەلىلەردى ۋاقىتىلى سالۋعا قاراجات 10،8% نەمەسە 22 ملرد تەڭگەگە ۇلعايتىلدى. قوسىمشا قارجىلاندىرۋ ەسەبىنەن الماتى اكىمدىگى قالا تۇرعىندارىنىڭ ساپالى اۋىز سۋعا قولجەتىمدىلىگىن قامتاماسىز ەتەدى.

"كولىك ينفراقۇرىلىمىن جاڭارتۋ ءۇشىن قارجىلاندىرۋدى 5،7%-عا ءوسىرۋ ارقىلى 15،1 ميلليارد تەڭگە قاراستىرىلدى. جوسپارلانعان جوبالاردى جۇزەگە اسىرۋ ارقىلى كولىك سالاسىن ودان ءارى دامىتۋ كوزدەلگەن. ونىڭ ىشىندە جاقسى جانە ورتاشا جاعدايداعى جولداردىڭ ۇلەسى 86%-دان 92%-عا دەيىن ءوستى"، - دەپ ءسوزىن تۇيىندەدى مەگاپوليس اكىمىنىڭ ورىنباسارى.