اقش-تىڭ رەسەيگە سالعان سوڭعى سانكتسيياسىنىڭ سالدارى قازاقستانعا دا ەسەر ەتٸپ, قور بيرجاسى اپاي-توپاي بولدى. بيرجادا شەتەل ۆاليۋتاسىنا دەگەن سۇرانىس ەلٸ كٷنگە باسىلماي جاتىر. سوعان بايلانىستى ۇلتتىق بانك پەن ٷكٸمەت مٷشەلەرٸ دە باسپاسٶز مەسليحاتىنا كەزەك-كەزەك شىعىپ, مٸنبەردەن تٷسە الاي قالعان جايى بار. قولدان كەلمەي جاتقان شارۋانى (قۇلدىراعان تەڭگەنٸ اۋىزدىقتاۋ) بىلاي ىسىرىپ قويىپ, بۇل ەكٸ تاراپ بٸر-بٸرٸنٸڭ مٸنٸن تەرۋگە دە كٶشە باستادى. ٶيتكەنٸ ولار بۇل مەسەلە شەشٸلمەسە, بٸرەۋٸنٸڭ وتستاۆكاعا كەتٸپ تىنۋ قاۋپٸ بارىن جاقسى بٸلەدٸ, دەپ جازادى Dalanews.kz.
"جىعىلعانعا جۇدىرىق" دەمەكشٸ, الىستان تاعى بٸر جاعىمسىز حاباردىڭ قۇلاعى قىلتيدى. ياعني, اقش ەكٸمشٸلٸگٸ قاڭتار ايىنىڭ سوڭىنا دەيٸن رەسەيگە قارسى جاڭا سانكتسييالار ەنگٸزۋگە نيەتتٸ. مىنا سانكتسييا سالدارىمەن كٷرەستە مٷشكٸل كٷيگە تٷسكەن بٸزدٸڭ اتقامٸنەرلەر كەلەسٸسٸمەن بەتپە-بەت كەلۋگە جٷرەكسٸنە مە دەڭٸزدەر.
يە, اقش ەكٸمشٸلٸگٸ قاڭتار ايىنىڭ سوڭىندا رەسەيگە قارسى جاڭا سانكتسييالار ەنگٸزۋگە نيەتتٸ. بۇل تۋرالى اقش پرەزيدەنتٸنٸڭ ۇلتتىق قاۋٸپسٸزدٸك جٶنٸندەگٸ كەڭەسشٸسٸ دجەيك سالليۆان مەلٸمدەدٸ.
"ول دجو بايدان بيلٸكتەن كەتكەنگە دەيٸن قابىلداناتىن "قوسىمشا شارالارعا" توقتالدى. سالليۆان امەريكا قۇراما شتاتتارى رەسەيدٸڭ قارجى سەكتورىنا قارسى اۋىر سانكتسييالار ەنگٸزگەنٸن, ەندٸ ونىڭ ٸزٸن باسا تاعى دا كٶپ سانكتسييالار باعىتتالاتىنىن ايتتى", — دەپ حابارلايدى ربك.
ايتا كەتسەك, اقش-تىڭ قازٸرگٸ پرەزيدەنت ەكٸمشٸلٸگٸ 20 قاڭتارعا دەيٸن بيلٸك باسىندا بولادى. دەمەك, كەلەسٸ ايدىڭ ورتاسىنا دەيٸن رەسەي ەكونوميكاسىن تاعى دا بٸر "توسىنسىيلار" كٷتٸپ تۇر. ال الدىڭعى توسىنسىيدىڭ رەسەي مەن قازاقستان ەكونوميكاسىنا كەلتٸرگەن سالدارىن مىنا ارادان وقي الاسىزدار.
