تۇركىستان وبلىسىنىڭ «اشىق اكىمدىك» كەڭسەسىندە ءجيى جەكە قابىلداۋ وتكىزىلىپ، تۇرعىندار ءوتىنىشى زاڭ اياسىندا شەشىمىن تاۋىپ كەلەدى. بۇگىن وبلىس اكىمىنىڭ ورىنباسارى بەيسەن تاجىبايەۆ بەكىتىلگەن كەستەگە سايكەس قوعامدىق قابىلداۋ وتكىزدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
بەيسەن تاجىبايەۆپەن كەزدەسۋگە كەلگەن ازاماتتار ماسەلەلەرىن ورتاعا سالىپ، وزدەرىن الاڭداتقان ماسەلەلەردى ايتتى.
تۇركىستاندىق تۇرعىن مەكتەپتەردە ىستىق تاماق بويىنشا كونكۋرسقا قاتىسۋ جايىن سۇراسا، ەندى ءبىرى ينكليۋزيۆتى ورتا قالىپتاستىرۋ باعىتىندا ۇسىنىسىن جەتكىزدى.
ال جاستار وزدەرى قىزىعا تاماشالايتىن «جايدارمان» ويىندارىنا قولداۋ كورسەتۋدى ءوتىندى. شىمكەنت قالاسىنان جازىلعان ازامات تۇركىستان قالاسىندا تۋريزم سالاسىن دامىتۋ بويىنشا ۇسىنىستارىن ايتتى.
تاعى ءبىر ازامات «مادەني مۇراعا» قاتىستى ماسەلەسىن ايتىپ، جەر تەلىمىن راسىمدەۋدى سۇرادى. سونداي-اق، نەگىزسىز جۇمىستان بوساتىلعان تۇرعىن ءوز نارازىلىعىن ءبىلدىردى.
جەكە قابىلداۋعا ءتيىستى باسقارما وكىلدەرى دە قاتىسىپ، قوردالانعان ماسەلەلەردىڭ جۇيەلى شەشىمىن تابۋعا اتسالىستى.
بەيسەن داۋلەت ۇلى وبلىس تۇرعىندارىنىڭ وتىنىشتەرىن مۇقيات تىڭداپ، زاڭدى شەشىلۋ جولدارىن ءتۇسىندىردى. سونىمەن قاتار ءتيىستى سالا ماماندارىنا كەيبىر ماسەلەلەردىڭ زاڭدىلىعىن قاراپ، وڭتايلى شەشىمىن قاراستىرۋدى تاپسىردى.
