كەزدەسۋگە باس دارىگەردىڭ ورىنباسارلارى، ءبولىم مەڭگەرۋشىلەرى، اعا مەدبيكەلەر قاتىستى. اڭگىمە بارىسىندا ولار مەديسينالىق كومەك كورسەتۋ بويىنشا جۇرگىزىلىپ جاتقان جۇمىستار تۋرالى ايتىپ، دامۋ پەرسپەكتيۆالارى جونىندە پىكىرلەرىمەن ءبولىستى.
قالا اكىمى باقىتجان ساعىنتايەۆ بارلىق دارىگەرلەر مەن مەديسينا قىزمەتكەرلەرىنە كورسەتكەن باتىلدىعى ءۇشىن العىس ءبىلدىردى. 4-10 قاڭتار ارالىعىندا اۋرۋحانانىڭ قابىلداۋ بولىمىنە ءتۇرلى جاراقاتتارمەن – اتىس، كوگەرگەن جارالارمەن، دەنە جاراقاتتارىمەن زارداپ شەككەندەر ءتۇستى. اۋرۋحاناعا بارلىعى 305 ادام جۇگىنگەن، ولاردىڭ 200-گە جۋىعى قىسقا مەرزىمدە تۇسكەن. اۋرۋحانانىڭ بارلىق 9 وپەراسيالىق ءبولىمى تاۋلىك بويى جانە ۇزدىكسىز جۇمىس ىستەدى، 259 وپەراسيا جاسالدى.
قۇرامىندا تراۆماتولوگ-دارىگەرلەر، حيرۋرگتەر، نەيروحيرۋرگتەر، انەستەزيولوگ-رەانيماتولوگتار، مەدبيكەلەر جانە باسقا دا ماماندار بار 6 بريگادا جۇمىس ىستەدى. پاسيەنتتەردىڭ جاپپاي ءتۇسۋىن ەسكەرە وتىرىپ، مەديسينالىق سۇرىپتاۋ جۇيەسى ءوزىن جاقسى كورسەتتى. وسىلايشا، قىزمەتكەرلەردىڭ جۇمىسىنداعى حاوس پەن دۇربەلەڭدى بولدىرماۋعا مۇمكىندىك تۋدى.
اۋىر جاراقات العاندار شۇعىل تۇردە وپەراسيالىق بلوكقا وتالىق ەمدەلۋگە جىبەرىلدى، ورتاشا اۋىرلىقتاعى پاسيەنتتەر بولىمشەلەرگە جاتقىزىلدى، جەڭىل جاراقات العاندار تەكسەرىلىپ، تاڭىلىپ، امبۋلاتوريالىق ەمدەۋگە ۇيلەرىنە جىبەرىلدى.
– وتە ءقاۋىپتى جاعدايعا قاراماستان، اۋرۋحانا قىزمەتكەرلەرى ناعىز ەرلىك پەن شىنايى ءپاتريوتيزمدى كورسەتتى، وزدەرىنىڭ كاسىبي بورىشتارىن باتىلدىقپەن ورىنداۋدى جالعاستىردى، – دەپ اتاپ ءوتتى باقىتجان ساعىنتايەۆ، تج كەزىندە جۇمىس ىستەگەن 430 قىزمەتكەردىڭ بارلىعى ماتەريالدىق ىنتالاندىرىلعانىن حابارلادى.
اۋرۋحانانىڭ ماتەريالدىق-تەحنيكالىق بازاسىن ودان ءارى دامىتۋ ماقساتىندا قالا اكىمى باقىتجان ساعىنتايەۆ قوعامدىق دەنساۋلىق باسقارماسىنا قاجەتتى مەديسينالىق جابدىقتار مەن جەدەل جاردەم كولىكتەرىن ساتىپ الۋعا ءوتىنىم دايىنداۋدى تاپسىردى. دەنساۋلىق ساقتاۋ مەكەمەلەرىن مودەرنيزاسيالاۋدىڭ ءۇش جىلدىق باعدارلاماسى اياسىندا ليفتىلەردى ارنايى مەديسينالىق ليفتىلەرگە اۋىستىرۋدى قاراستىرۋ قاجەت.
بۇگىندە اۋرۋحانانىڭ قىزمەتى الماتى قالاسىنىڭ جانە بۇكىل قازاقستاننىڭ تۇرعىندارىنا جوعارى بىلىكتى شۇعىل جانە جوسپارلى مەديسينالىق كومەك كورسەتۋگە باعىتتالعان. ستاسيونار 320 ورىنعا ەسەپتەلگەن. اۋرۋحانادا جەتەكشى مەديسينالىق جوعارى وقۋ ورىندارىنىڭ كافەدرالارى ورنالاسقان.
2021 جىلى كلينيكا اۋىر جانە وتە اۋىر دارەجەلى COVID-19 پاسيەنتتەرىن قابىلداي وتىرىپ، ءى ەشەلونداعى جۇقپالى اۋرۋلار اۋرۋحاناسى رەتىندە 5 اي جۇمىس ىستەدى. بارلىعى كۆي بار 3789 پاسيەنت ەمدەلدى.
الماتى اكىمدىگىنىڭ ارقاسىندا اۋرۋحانا ورتالىقتاندىرىلعان وتتەگى ستانسياسىمەن قامتاماسىز ەتىلگەن. «ب» جانە «ۆ» كلاسىنداعى مەديسينالىق قالدىقتاردى زالالسىزداندىرۋ بويىنشا تەز قۇرىلاتىن مودۋلدىك كەشەندەر سالىندى.
بۇگىندە اۋرۋحانا 100% مەديسينالىق گازدارمەن قامتاماسىز ەتىلگەن جانە ءار پالاتادا وتتەگى كونسولدەرى ورناتىلعان. اۋرۋحاناىشىلىك ينفەكسيالاردىڭ تارالۋىنىڭ الدىن الۋ ءۇشىن قجشككا-نىڭ ءار قاباتىندا جەكە سورۋ-سىرتقا تاراتۋ جەلدەتكىشى جۇمىس ىستەيدى.
