باسقوسۋدا وبلىس اكىمى ەل اقساقالدارىن مەرەكەمەن قۇتتىقتاپ، وبلىس ورتالىعىن دامىتۋعا رۋحاني تۇرعىدان دامىتۋعا اتسالىسۋعا شاقىردى.
– وبلىس ورتالىعى الداعى ۋاقىتتا جاڭا كەيىپكە ەنەدى. بۇعان ەلباسىمىز ايرىقشا نازار اۋدارىپ وتىر. الداعى ۋاقىتتا تۇركىستاندا جاڭا عيماراتتار، تۇرعىن ۇيلەر، اۋەجاي، اكىمشىلىك ىسكەرلىك ورتالىق بوي كوتەرەتىن بولادى. تۇركى دۇنيەسىنىڭ ورتالىعى رەتىندە بارلىق جاعىنان ساي بولماق. سونىمەن قاتار، تۇركىستان – رۋحانياتتىڭ، مادەنيەتتىڭ ورداسى بولۋى ءتيىس. بۇل تۇرعىدا ەل اعالارىنا، اقساقالدارعا ارتىلار جۇك اۋىر، – دەدى جانسەيىت تۇيمەبايەۆ.
سونداي-اق، وبلىس باسشىسى مەرەكەگە وراي ارداگەرلەرگە دەمالىس ايماقتارىنا جولداما سىيلادى. ولاردىڭ قاتارىندا تۇركىستان وبلىسىنىڭ اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ، تۇركىستان قالاسىنىڭ اقساقالدار القاسىنىڭ مۇشەسى ءجۇمادىل كىشىبايەۆ، تۇركىستان قالاسىنىڭ قوعامدىق كەلىسىم كەڭەسىنىڭ مۇشەسى رۇستەم كاميلوۆ سىندى 20-عا جۋىق ارداگەرلەر بار.
تۇركىستان وبلىسى اكىمىنىڭ باسپا ءسوز قىزمەتى
