سونىڭ ءبىرى – ارىس قالاسىنىڭ تۇرعىنى الەكسەي راديۆيل. ول وتكەن جىلى ارىس قالاسى اكىمدىگى «حالىقتى جۇمىسپەن قامتۋ» ورتالىعىنا جۇمىسسىز رەتىندە تىركەلىپ، «بيزنەس باستاۋ» وقۋىن وقۋىپ، مەملەكەتتىك گرانتقا قاتىسۋ ءۇشىن «ەت باعىتىندا بورداقىلاۋ كاسىبى» ءىسى بويىنشا بيزنەس جوسپارىن ۇسىنىپ، جوبانى كوميسسيا مۇشەلەرىنىڭ الدىندا ءساتتى قورعاپ شىققان.
ناتيجەسىندە 400 اەك (1 225 200) كولەمىندە گرانتقا قول جەتكىزىپ، قاراجاتقا ءتورت باس بۇقا ساتىپ العان. ونىڭ ۇشەۋى – قازاقتىڭ ەتتى اقباس سيىرى.
– اكەم بالا كەزىمدە مال بورداقىلاۋمەن اينالىستى. عالامتوردى اقتارىپ، ءمۇيىزدى ءىرى قارانىڭ تولايىم تابىسقا جەتەلەيتىنىنە كوزىم جەتتى. قالالىق جۇمىسپەن قامتۋ بولىمىنە قۇجات وتكىزىپ، گرانت جەڭىپ الدىم. الداعى ۋاقىتتا ءىرى كاسىپكەرلەردىڭ تىنىس-تىرشىلىگىنەن كورىپ-بىلگەنىمدى ءوز كاسىبىمدە قايتالاپ كورمەك ويىم بار، – دەيدى 21 جاستاعى الەكسەي راديۆيل.
جاس فەرمەردىڭ ايتۋىنشا، قارا مالدىڭ ىشىندە وڭدىسى دا، قوڭدىسى دا قازاقتىڭ ءتول مالى – اقباس سيىر. ءبىر جاستان اسقان بۇقاشىعى 200-215 كەلى ەت بەرەدى ەكەن.
قازاقشا ەركىن سويلەيتىن الەكسەي اناسى جانە ىنىسىمەن بىرگە وتباسىلىق كاسىپتى جانداندىرىپ، الداعى ۋاقىتتا ءسۇتتى باعىتتا دا شارۋاشىلىقتى دامىتۋدى جوسپارلاپ وتىر.
