بەلگىلى ادۆوكاتتار رەنا كەريموۆا مەن عالىم نۇرپەيىسوۆ بيشىمبايەۆقا قاتىستى شىققان ۇكىم تۋرالى ويىن ايتتى. كەريموۆانىڭ سوزىنشە، بيشىمبايەۆتى ءومىر بويىنا سوتتاۋ – ارتىق بولار ەدى، - دەپ حابارلايدى Dalanews.kz. 

«بۇل too much (ارتىق) بولار ەدى. قوعامدىق قىسىمنىڭ كەسىرىنەن سونداي جازا تاعايىندالار ەدى. بۇل ءىس كاتەگورياسى بويىنشا مانياكتار، قاتىگەز ادام ولتىرۋشىلەر ءومىر بويىنا سوتتالار ەدى. مەن بۇعان دەيىن دە 20-25 جىل ارالىعىنداعى جازا تاعايىندالاتىنىن ايتقان بولاتىنمىن. ءومىر بويىنا سوتتالاتىنىنا سەنبەدىم.  ارينە، ول ءومىر بويىنا سوتتالسا دا ءادىل بولار ەدى»، - دەيدى رەنا كەريموۆا Orda.kz باسىلىمىنا بەرگەن سۇحباتىندا.

ادۆوكاتتاردىڭ سوزىنشە، بيشىمبايەۆ قازاقستاندا ايەلىن ولتىرگەنى ءۇشىن ەڭ اۋىر جازا تاعايىندالعان.

ال ادۆوكات عالىم نۇرپەيىسوۆتىڭ ايتۋىنشا، بيشىمبايەۆقا تاعايىندالعان 24 جىل دا ارتىق.

«بۇل جەردە بيشىمبايەۆتىڭ «ونى ولتىرگىم كەلەدى» دەگەن پيعىلى دالەلدەنۋى كەرەك ەدى. نەمەسە جۇيەلى تۇردە ۇنەمى قيناۋى ەمەس، ونى ادەيى ءولتىرۋى دالەلدەنۋى كەرەك»، - دەيدى ادۆوكات.

نۇرپەيىسوۆ مىسال رەتىندە كۇدىكتى جابىرلەنۋشىنى 18 رەت پىشاقتاپ، 12 جىلعا سوتتالعان جاعداي تۋرالى ايتتى.

«سوت 24 جىل جازانى قوعامدىق قىسىمنىڭ كەسىرىنەن بەردى دەپ ويلايمىن. (...) بۇل جەردە قىلمىستى دالەلدەيتىن قۇرال (ورۋديە) جوق. سوندىقتان بۇل جاعدايدا بيشىمبايەۆتىڭ باسىندا نە بولعانىن انىقتاۋ كەرەك. ونى اقتاپ وتىرعان جوقپىن. ءبىراق زاڭ جاعىنان دۇرىس باعا بەرۋىمىز كەرەك ەدى. ىستە ينتيم ەلەمەنتتەر بولسا دا پروسەسس اشىق ءوتتى»، - دەيدى عالىم نۇرپەيىسوۆ.

ەسكە سالايىق، 13 مامىردا بيشىمبايەۆ ءىسى بويىنشا ۇكىم شىققان بولاتىن. القابيلەر شەشىمى بويىنشا، بيشىمبايەۆ 24 جىلعا، بايجانوۆ 4 جىلعا باس بوستاندىعىنان ايىرىلدى.