– شىن مانىندە، ءبىز ايتىپ جۇرگەن ادىلەتتى قازاقستاندى ادال ازاماتتار قۇرادى. بۇل – بىر-بىرىمەن وتە تىعىز بايلانىستى ۇعىمدار. وتانعا، وتباسىنا ادالدىق – پاراساتتىلىق پەن ادامگەرشىلىكتىڭ بەلگىسى. ادال ەڭبەك ەتىپ، ادال تابىس تاپقان ادام جەتىستىككە جەتەدى، قۇرمەتكە يە بولادى.
ۇلى اباي «ادال ەڭبەكپەن مال ىزدەمەك – ارلى ادامنىڭ ءىسى» دەگەن. ال، ارلى ادام ادىلەتسىزدىك جاسامايدى. ءار سالادا ادالدىق باستى ورىندا تۇرسا، ءادىل قوعام ورنايدى. جەمقورلىققا جول بەرىلمەيدى، ەل مۇددەسىنە ساي شەشىم قابىلدانادى. ءبىر سوزبەن ايتساق، قوعامداعى ىزگىلىكتىڭ ءبارى ادالدىقتان باستاۋ الادى.
ەندەشە، ادىلەتتى قازاقستان جانە ادال ازامات ۇعىمدارى ەل تىرەگى بولاتىن ەگىز قۇندىلىق رەتىندە ءاردايىم قاتار تۇرۋعا ءتيىس. ادىلەتتى قازاقستاندى قۇرۋ ءۇشىن ءاربىر وتانداسىمىز ادال ازامات بولۋعا ۇمتىلۋى قاجەت. سونىمەن بىرگە، جاس ۇرپاقتى ادال ازامات ەتىپ تاربيەلەۋىمىز كەرەك. ۇلتتىق بىرەگەيلىگىمىزدى نىعايتىپ، ەلىمىزدىڭ جاڭا قۇندىلىقتارىن ورنىقتىرۋ ءۇشىن جۇيەلى جۇمىس جاسالۋعا ءتيىس»
ءوز سوزىندە مەملەكەت باسشىسى مەملەكەتتىك نىشانداردى ازىرلەۋ جانە بەكىتۋ ءتارتىبىن بارلىق وڭىرگە بىردەي ەتىپ، رەتكە كەلتىرۋ كەرەك ەكەنىن العا تارتتى.
– مەملەكەتتىك نىشانداردى جەتىلدىرۋ قاجەت. ءقازىر كەز كەلگەن ەلدىڭ ىقپالدى بولۋىنا ۇلتتىق برەندتىڭ اسەرى مول. سوندىقتان، ونىڭ تانىمالدىعىن ارتتىرا ءتۇسۋ كەرەك. ول ءۇشىن ءبىرىڭعاي ديزاين-كودتى، ورتاق ستاندارتتى ساقتاۋ وتە ماڭىزدى. نىشاندارىمىز بىرەگەي ۇلتتىق كودىمىزدى ناقتى ءارى ايقىن كورسەتۋى كەرەك.
مەن جاقىندا اسسامبلەيا سەسسياسىندا ەلىمىزدىڭ گەرالديكا بەلگىلەرىن جەتىلدىرۋ قاجەتتىگى تۋرالى ايتتىم. الدىمەن ايماقتاردىڭ جانە قالالاردىڭ تاڭباسىن ءبىرىڭعاي ۇلگىگە كەلتىرۋ كەرەك دەپ سانايمىن. ءقازىر ولاردىڭ كوبىنىڭ مازمۇنى جانە ءپىشىنى – اركەلكى. سوعان بايلانىستى قوعامدا ءجيى سىن دا ايتىلادى. بۇل سالاعا مۇقيات تالداۋ جاساپ، ورتاق ۇستانىمدار ازىرلەۋ قاجەت.
ايماقتىق نىشانداردى ازىرلەۋ جانە بەكىتۋ ءتارتىبىن بارلىق وڭىرگە بىردەي ەتىپ، رەتكە كەلتىرگەن ءجون. ەندى، مەملەكەتتىك ناگرادالار ماسەلەسىنە جەكە توقتالعىم كەلەدى. بۇل سالانىڭ قالىپتاسقان وزىندىك ءداستۇرى بار، – دەپ مەملەكەت باسشىسى كوكەيدە جۇرگەن ويىن ورتاعا سالدى.
