«ادىلدىك جانە وركەندەۋ» قوعامدىق قورى مەملەكەتتىك مەكتەپتەردەگى تاماقتىڭ ساپاسىنا قاتىستى الەۋمەتتىك مونيتورينگتىڭ باستالعانىن حابارلاپ، وعان بارلىق قازاقستاندىق وقۋشىلاردىڭ اتا-انالارىن قاتىسۋعا شاقىرادى. ول ءۇشىن وسى جىلدىڭ 14 مەن 28 قازانى ارالىعىندا وزىڭىزگە قولايلى ۋاقىتتا بەرىلگەن سۇراقتارعا ونلاين جاۋاپ بەرۋ قاجەت.

بۇل الەۋمەتتىك مونيتورينگتە مەكتەپ وقۋشىلارىن ءدامدى جانە پايدالى تاماقتاندىرۋعا قاتىستى بارلىق سۇراقتار قامتىلعان. قور اتا-انالاردان ءمازىردىڭ ارتۇرلىلىگىن، اسحانالاردىڭ سانيتارلىق جاعدايىن، وقۋشىلاردىڭ تاماقتانۋ كەستەسىنىڭ ىڭعايلىلىعىن جانە باسقا دا قىزمەتتەردى باعالاۋدى سۇرايدى.

ساۋالناما جاسىرىن تۇردە وتەدى. جاۋاپ بەرۋ ۋاقىتى بەس مينۋتتان اسپايدى.

اتا-انالاردىڭ جاۋاپتارى مەملەكەتتىك مەكتەپتەردە تاماقتانۋ پروسەسىن ۇيىمداستىرۋعا قاتىستى ەڭ وزەكتى ماسەلەلەردى انىقتاۋعا كومەكتەسەدى. ساۋالناما ناتيجەلەرى باق-تا جاريالانىپ، ق ر وقۋ-اعارتۋ مينيسترلىگىنە جانە باسقا دا مۇددەلى مەملەكەتتىك ورگاندارعا جىبەرىلەدى. ساۋالناماعا قاتىسۋشىلاردىڭ ءوز ۇسىنىستارىن بەرۋگە مۇمكىندىگى دە بار. اتا-انالاردىڭ پىكىرىنە سۇيەنە وتىرىپ، قور مەكتەپ اسحانالارىنىڭ ساپاسىن جاقسارتۋ بويىنشا ۇسىنىستار ازىرلەيدى.

مەملەكەتتىك مەكتەپتەردەگى بالالاردىڭ تاماقتانۋ ساپاسىن باقىلاۋ تاقىرىبى – «ادىلدىك جانە وركەندەۋ» قورى قىزمەتىنىڭ باسىم باعىتتارىنىڭ ءبىرى. جۇمىس ق ر وقۋ-اعارتۋ مينيسترلىگىمەن جانە قازاق تاعامتانۋ اكادەمياسىمەن بىرلەسىپ جۇرگىزىلۋدە.

الەۋمەتتىك مونيتورينگتەن باسقا، قور مەكتەپتەگى تاماقتانۋ ساپاسىن باعالاۋ بويىنشا قوعامدىق باقىلاۋ شەڭبەرىندە تۇراقتى تۇردە باسقا دا ءىس-شارالاردى وتكىزەدى. مىسالى، قور بەلسەندىلەرى جەتىسۋ وبلىسىنىڭ، تۇركىستان جانە الماتى وبلىستارىنىڭ، الماتى قالاسىنىڭ مەكتەپ اسحانالارىنا تەكسەرۋ جۇرگىزدى.

قور وسى تەكسەرىس بارىسىندا بالالارعا قوسىمشا تاماق پورسياسىنىڭ بەرىلمەۋى، استىڭ مازىردەگى سيپاتتاماعا سايكەس كەلمەۋى، بۋفەتتەردە مەكتەپتەردە ساتۋعا تىيىم سالىنعان ونىمدەردىڭ ساتىلۋى (ونىڭ ىشىندە شوكولاد پەن ەنەرگەتيكالىق سۋسىندار)، سانيتارلىق نورمالار مەن تاماق دايىنداۋ تەحنولوگيالارىنىڭ ساقتالماۋى سەكىلدى بۇزۋشىلىقتاردى انىقتادى. سونداي-اق، مەكتەپ اسحاناسىندا گاز باللونىن پايدالانۋ، قىزمەتكەرلەردىڭ ارنايى ديپلومىنىڭ جوقتىعى سەكىلدى جايتتەر دە ءجيى كەزدەسەدى. بارلىق انىقتالعان بۇزۋشىلىقتار بويىنشا اكتىلەر جاسالىپ، باقىلاۋشى ورگاندارعا جىبەرىلدى. قور بيىلعى وقۋ جىلىنىڭ سوڭىنا دەيىن ەلىمىزدىڭ بارلىق وڭىرىندەگى مەكتەپ اسحانالارىن تەكسەرىپ شىعۋدى جوسپارلاپ وتىر.

انىقتاما: «ادىلدىك جانە وركەندەۋ» قوعامدىق قورى بەلسەندى ازاماتتاردىڭ باستاماسىمەن قۇرىلدى. بۇگىندە قازاقستاننىڭ بارلىق ايماعىندا ءوز وكىلدىگى مەن 5 000 استام جاقتاسى بار. قوردىڭ جوبالارى مەن باستامالارى كاسىپورىندارداعى قاۋىپسىزدىك تەحنيكاسىن ساقتاۋ، مەكتەپتەگى تاماق ساپاسىن باقىلاۋ، جوندەلگەن جولدىڭ ساپاسىن تەكسەرۋ سەكىلدى ماڭىزدى ماسەلەلەرگە ارنالعان. قور قازاقستاندىقتاردىڭ ەڭبەك قۇقىعىن قورعاۋعا قاتىستى تەگىن زاڭگەرلىك كومەك كورسەتەدى. ەل تۇرعىندارىنىڭ پىكىرىن انىقتاۋ ءۇشىن قور «الەۋمەتتىك مونيتورينگ» جۇرگىزەدى. كەز كەلگەن قازاقستاندىق مانيفەستكە قول قويىپ، قور جۇمىسىنا قوسىلا الادى.