قازاقستاندا تۋريزم سالاسى كوپتەگەن كۇردەلى ماسەلەلەرگە تاپ بولىپ وتىر. بۇل تۋرالى پرەمەر-مينيستر ولجاس بەكتەنوۆ ۇكىمەتتەگى بريفينگ بارىسىندا مالىمدەدى، دەپ حابارلايدى Dalanews.kz.
ونىڭ ايتۋىنشا، ەلىمىزدەگى كوپتەگەن دەمالىس ورىندارى الەمدىك ستاندارت تۇگىلى، قاۋىپسىزدىك پەن جايلىلىققا قاتىستى ەڭ قاراپايىم تالاپتارعا دا سايكەس كەلمەيدى.
“جۇمىس جۇرگىزىلەتىن بولادى. وكىنىشكە قاراي، بۇل سالادا بىزگە ءتان “اۋرۋ” بار. ءاردايىم ءبارى دايىن دەگەن ادەمى ەسەپتەر كەلەدى، ءبىراق ءىس جۇزىندە ولاي بولماي شىعادى. مۇندا ۇكىمەت تاراپىنان كەمشىلىك بولعانىن اشىق مويىندايمىز”، — دەدى بەكتەنوۆ.
سونداي-اق ول ءوزى سوڭعى رەت الاكولدە 2021 جىلى دەمالعانىن، ال جۇمىس ساپارلارىمەن كەندەرلى كۋرورتتىق ايماعىندا بولعانىن اتاپ ءوتتى.
بۇعان دەيىن مەملەكەت باسشىسى قاسىم-جومارت توقايەۆ الاكول جاعالاۋىنىڭ تۋريستىك ماۋسىمعا دايىن ەمەستىگىن سىنعا الىپ، جاۋاپتى تۇلعالاردى جاۋاپكەرشىلىككە تارتۋدى تاپسىرعان ەدى. پرەزيدەنتتىڭ سىنىنان كەيىن الاكول جاعاسىندا جەدەل كەڭەس وتكىزىلدى. ارتىنشا ۆيسە-پرەمەر ەرمەك كوشەربايەۆ پەن تۋريزم جانە سپورت ءمينيسترى ەربول مىرزابوسىنوۆ وڭىرلەرگە اتتاندى.
