ال سوت زالىندا ايعايعا باسقان ايىپتالۋشىنىڭ تۋىستارى ۇكىممەن كەلىسپەدى. ولار جاپ-جاس جىگىتتەرگە سۋديا «تىم اۋىر جازا كەستى» دەپ ەسەپتەيدى.
ولاردى قولداۋعا سوڭعى پروسەسسكە تۋىستارى مەن دوستارى تۇگەل كەلگەن. سۋديا بىردەن ۇكىمدى وقۋعا كىرىستى.
– الەكەيەۆ دىنمۇحاممەدتى ايىپتى دەپ تانىلىپ، 11 جىل 3 ايعا باس بوستاندىعىنان ايىرىلسىن، جازاسىن قىلمىستىق اتقارۋ جۇيەسى مەكەمەسىنىڭ ورتاشا قاۋىپسىزدىك مەكەمەسىندە وتەسىن. جاندوس الەكەيەۆ ايىپتى دەپ تانىلىپ، 4 جىل 8 ايعا باس بوستاندىعىنان ايىرىلسىن، جازاسىن ورتاشا قاۋىپسىزدىك مەكەمەسىندە وتەسىن، – دەدى سۋديا ەركىن مايشينوۆ.
سوت بارىسىندا قارا كولىكتى تىزگىندەگەن 20 جاستاعى دىنمۇحاممەدتىڭ ادام ولتىرۋگە وقتالعانى دالەلدەنسە، اق كولىكتىڭ رولىندە بولعان 24 جاستاعى جاندوس «بۇزاقىلىق» بابىمەن تۇرمەگە توعىتىلدى.
ۇكىمدى ەستىگەن الەكەيەۆتىڭ تۋىستارى جىلاپ-سىقتاپ، ايعايعا باستى. اۋىر جازا ارقالاعان جىگىتتەر دە ءوزىن ۇستاي الماي، ەموسياعا ەرىك بەردى. ەستەرىڭىزگە سالساق، الەۋمەتتىك جەلىنى شۋلاتقان جاپپاي توبەلەس جارتى جىل بۇرىن بولعان.
الماتىنىڭ قاق ورتاسىندا كولىكتەرىمەن ويران سالعان ءاعالى-ىنىلى الەكەيەۆتەر ءۇش ادامدى قاساقانا تاپاپ كەتكەن. كولىك استىندا قالعانداردىڭ ەكەۋى باسىنان جارالانسا، بىرەۋىنىڭ اياق-قولى سىنعان. ءبىراق جانجالدان جاپا شەككەن جىگىتتەر كەشىرىم بەرىپتى. سوندىقتان سوتتالۋشىلاردىڭ ادۆوكاتى «سۋديا كەسكەن جازا تىم اۋىر» دەپ ەسەپتەيدى.
– الەكەيەۆ دىنمۇحامەدتىڭ ىس-ارەكەتىندە 99-باپتىڭ قىلمىس قۇرامى جوق. پروكۋرور ونىڭ ىس-ارەكەتىن دۇرىس سارالاماعان. الەكەيەۆ جاندوس كوپبوسىن ۇلىنىڭ بۇزاقىلىق بويىنشا ەشقانداي قىلمىس قۇرامى جوق. ءبىزدىڭ ويىمىزشا، ول دا زاڭسىز. سوت ۇكىمى تىم قاتال، – دەپ ادۆوكات قايرات شوقانوۆ ويىن ورتاعا سالدى.
ەكى توپ اراسىنداعى توبەلەس كۇنى ءاعالى-ىنىلى الەكەيەۆتەر ءاليحان ەسىمدى باۋىرىنىڭ تۋعان كۇنىن تويلاپتى. تويدىڭ سوىڭ توبەلەسكە ۇلاسقان جىگىت كيكىلجىڭدە تۋىستارىنىڭ ارام پيعىلى بولماعانىن جەتكىزدى.
– جاندوستىڭ كىشكەنتاي بالاسى بار. دىنمۇحاممەد جيىرما جاسقا ەندى تولدى. وتباسىنىڭ اسىراۋشىلارى. تەرگەۋ جۇمىستارىنا كوڭىلىمىز تولمايدى. ادۆوكاتىمىزدىڭ دالەلدەرىن سۋديا ەسكەرمەدى، – دەيدى سوتتالۋشىنىڭ تۋىسى ءاليحان ناربەكوۆ.
وسىعان دەيىن پروكۋرور اعايىندىلارعا 15 جىل جازا كەسۋدى سۇراعان. ال ايىپتالۋشىلار وتكەن ىسكە وكىنىپ، قىلمىسقا قاساقانا بارماعانىن ايتقان ەدى. بارىنەن بۇرىن ەكى بىردەي ۇلىنىڭ اباقتىعا اتتانعانى اناسىنىڭ جانىنا قاتتى باتتى. سوت زالىنان ەسەڭگىرەپ شىققان ول الداعى ۋاقىتتا اپەللياسياعا جۇگىنىپ، بالالارىنىڭ جازاسىن جەڭىلدەتۋگە تىرىسپاقشى.
سىمبات عالىمبەك ۇلى
