Adamdardy kólikpen qaqqan aǵaiyndy eki jigitke qatysty sot úkimi shyqty
Al sot zalynda aiǵaiǵa basqan aiyptalýshynyń týystary úkimmen kelispedi. Olar jap-jas jigitterge sýdia «tym aýyr jaza kesti» dep esepteidi.
Olardy qoldaýǵa sońǵy protsesske týystary men dostary túgel kelgen. Sýdia birden úkimdi oqýǵa kiristi.
– Álekeev Dinmuhammedti aiypty dep tanylyp, 11 jyl 3 aiǵa bas bostandyǵynan aiyrylsyn, jazasyn qylmystyq atqarý júiesi mekemesiniń ortasha qaýipsizdik mekemesinde ótesin. Jandos Álekeev aiypty dep tanylyp, 4 jyl 8 aiǵa bas bostandyǵynan aiyrylsyn, jazasyn ortasha qaýipsizdik mekemesinde ótesin, – dedi sýdia Erkin Maishinov.
Sot barysynda qara kólikti tizgindegen 20 jastaǵy Dinmuhammedtiń adam óltirýge oqtalǵany dáleldense, aq kóliktiń rólinde bolǵan 24 jastaǵy Jandos «buzaqylyq» babymen túrmege toǵytyldy.
Úkimdi estigen Álekeevtiń týystary jylap-syqtap, aiǵaiǵa basty. Aýyr jaza arqalaǵan jigitter de ózin ustai almai, emotsiiaǵa erik berdi. Esterińizge salsaq, áleýmettik jelini shýlatqan jappai tóbeles jarty jyl buryn bolǵan.
Almatynyń qaq ortasynda kólikterimen oiran salǵan aǵaly-inili Álekeevter úsh adamdy qasaqana tapap ketken. Kólik astynda qalǵandardyń ekeýi basynan jaralansa, bireýiniń aiaq-qoly synǵan. Biraq janjaldan japa shekken jigitter keshirim beripti. Sondyqtan sottalýshylardyń advokaty «sýdia kesken jaza tym aýyr» dep esepteidi.
– Álekeev Dinmuhamedtiń is-áreketinde 99-baptyń qylmys quramy joq. Prokýror onyń is-áreketin durys saralamaǵan. Álekeev Jandos Kópbosynulynyń buzaqylyq boiynsha eshqandai qylmys quramy joq. Bizdiń oiymyzsha, ol da zańsyz. Sot úkimi tym qatal, – dep advokat Qairat Shoqanov oiyn ortaǵa saldy.
Eki top arasyndaǵy tóbeles kúni aǵaly-inili Álekeevter Álihan esimdi baýyrynyń týǵan kúnin toilapty. Toidyń soyń tóbeleske ulasqan jigit kikiljińde týystarynyń aram piǵyly bolmaǵanyn jetkizdi.
– Jandostyń kishkentai balasy bar. Dinmuhammed jiyrma jasqa endi toldy. Otbasynyń asyraýshylary. Tergeý jumystaryna kóńilimiz tolmaidy. Advokatymyzdyń dálelderin sýdia eskermedi, – deidi sottalýshynyń týysy Álihan Narbekov.
Osyǵan deiin prokýror aǵaiyndylarǵa 15 jyl jaza kesýdi suraǵan. Al aiyptalýshylar ótken iske ókinip, qylmysqa qasaqana barmaǵanyn aitqan edi. Bárinen buryn eki birdei ulynyń abaqtyǵa attanǵany anasynyń janyna qatty batty. Sot zalynan eseńgirep shyqqan ol aldaǵy ýaqytta apelliatsiiaǵa júginip, balalarynyń jazasyn jeńildetýge tyryspaqshy.
Symbat Ǵalymbekuly
