ماڭعىستاۋ وبلىسى مۇنايلى اۋدانى پروكۋرورىنىڭ بۇرىنعى ورىنباسارى ابايسىزدا كىسى ءولتىرىپ العانى ءۇشىن 1،5 جىلعا سوتتالدى، دەپ حابارلايدى Dalanews.kz.
سوتتا 2023 جىلدىڭ جەلتوقسان ايىندا ماڭعىستاۋ وبلىسى مۇنايلى اۋدانى پروكۋرورىنىڭ بۇرىنعى ورىنباسارى ت. اقتاۋ قالاسىنىڭ مەملەكەتتىك كىرىستەر باسقارماسى باسشىسىنىڭ ورىنباسارى، جابىرلەنۋشى م-مەن جانجالداسىپ، اقىرىندا ونى اۋىر سوققىعا جىققانى انىقتالدى. سالدارىنان جابىرلەنۋشى جەرگە قۇلاپ، ەسىن جيماستان العان جاراقاتتاردان قايتىس بولعان.
سوتتالۋشىنىڭ كىناسى جابىرلەنۋشى وكىلى مەن كۋاگەرلەردىڭ جاۋاپتارىمەن، سوت ساراپتامالارىنىڭ قورىتىندىلارىمەن جانە ءىستىڭ باسقا ماتەريالدارىمەن دالەلدەندى.
ءجارىسسوز بارىسىندا مەملەكەتتىك ايىپتاۋشى باستاپقى ايىپتى وزگەرتىپ، ت-نى قك-نىڭ 104-بابىنىڭ 1-بولىگىندە كوزدەلگەن قىلمىستى جاساعانى ءۇشىن كىنالى دەپ تانۋدى سۇرادى. ءىس وزگەرتىلگەن ايىپ بويىنشا قارالدى.
سوت جازا تاعايىنداۋ كەزىندە جاۋاپتىلىق پەن جازانى جەڭىلدەتەتىن ءمان-جايلار رەتىندە سوتتالۋشىنىڭ ءوز كىناسىن مويىنداۋىن، شىن جۇرەكتەن وكىنۋىن، اسىراۋىندا ءۇش جاس بالاسىنىڭ بولۋىن، ونىڭ بىرەۋىنىڭ ءۇشىنشى توپتاعى مۇگەدەك ەكەنىن ەسكەرگەن. اۋىرلاتاتىن ءمان-جايلار انىقتالعان جوق.
"سوتتالۋشى ت. وزگەرتىلگەن ايىپ بويىنشا قك-نىڭ 104-بابىنىڭ 1-بولىگىمەن (ابايسىزدا قازاعا ۇشىراتقانى ءۇشىن) كىنالى دەپ تانىلىپ، وعان 1 جىل 6 ايعا باس بوستاندىعىنان شەكتەۋ جازاسى تاعايىندالدى. ۇكىم زاڭدى كۇشىنە ەنگەن جوق. قازىرگى تاڭدا ءىس اپەللياسيالىق سوت القاسىندا قارالۋدا"، - دەيدى اقتاۋ قالالىق سوتىنىڭ باسپا ءسوز قىزمەتى.
