Mańǵystaý oblysy Munaily aýdany prokýrorynyń burynǵy orynbasary abaisyzda kisi óltirip alǵany úshin 1,5 jylǵa sottaldy, dep habarlaidy Dalanews.kz.
Sotta 2023 jyldyń jeltoqsan aiynda Mańǵystaý oblysy Munaily aýdany prokýrorynyń burynǵy orynbasary T. Aqtaý qalasynyń memlekettik kirister basqarmasy basshysynyń orynbasary, jábirlenýshi M-men janjaldasyp, aqyrynda ony aýyr soqqyǵa jyqqany anyqtaldy. Saldarynan jábirlenýshi jerge qulap, esin jimastan alǵan jaraqattardan qaitys bolǵan.
Sottalýshynyń kinási jábirlenýshi ókili men kýágerlerdiń jaýaptarymen, sot saraptamalarynyń qorytyndylarymen jáne istiń basqa materialdarymen dáleldendi.
Jaryssóz barysynda memlekettik aiyptaýshy bastapqy aiypty ózgertip, T-ny QK-niń 104-babynyń 1-bóliginde kózdelgen qylmysty jasaǵany úshin kináli dep tanýdy surady. Is ózgertilgen aiyp boiynsha qaraldy.
Sot jaza taǵaiyndaý kezinde jaýaptylyq pen jazany jeńildetetin mán-jailar retinde sottalýshynyń óz kinásin moiyndaýyn, shyn júrekten ókinýin, asyraýynda úsh jas balasynyń bolýyn, onyń bireýiniń úshinshi toptaǵy múgedek ekenin eskergen. Aýyrlatatyn mán-jailar anyqtalǵan joq.
"Sottalýshy T. ózgertilgen aiyp boiynsha QK-niń 104-babynyń 1-bóligimen (abaisyzda qazaǵa ushyratqany úshin) kináli dep tanylyp, oǵan 1 jyl 6 aiǵa bas bostandyǵynan shekteý jazasy taǵaiyndaldy. Úkim zańdy kúshine engen joq. Qazirgi tańda is apelliatsiialyq sot alqasynda qaralýda", - deidi Aqtaý qalalyq sotynyń baspasóz qyzmeti.
