اباي وبلىسىنىڭ اكىمى بەرىك ءۋالي ماڭعىستاۋ وبلىسىنان ارنايى كەلگەن دەلەگاسيا مۇشەلەرىمەن كەزدەستى. كەزدەسۋگە ماڭعىستاۋ وبلىسى اكىمىنىڭ ءبىرىنشى ورىنباسارى ەربول ىزبەرگەنوۆ، وبلىس اكىمىنىڭ ورىنباسارى تىلەگەن ابىشيەۆ، قوعامدىق كەڭەس ءتوراعاسى بەكمۇرات ءجۇسىپوۆ جانە مەملەكەتتىك قىزمەت ارداگەرى دارجوك سەيباعىتوۆ قاتىستى،- دەپ حابارلايدى Dalanews.kz
اباي وبلىسىندا ابايدىڭ 180 جىلدىعىنا وراي مەملەكەت باسشىسى قاسىم-جومارت كەمەل ۇلى توقايەۆتىڭ قولداۋىمەن «ابايعا قۇرمەت» اكسياسى باستالعان بولاتىن. اكسيا اياسىندا ەلىمىزدىڭ ءار ءوڭىرى اباي وبلىسىنا ءبىر نىساننان تارتۋ ەتەدى. كەزدەسۋدە وبلىس اكىمى ماڭعىستاۋ وبلىسىنىڭ يگى باستاماعا العاش بولىپ قولداۋ تانىتقانى ءۇشىن العىسىن جەتكىزدى.
«ماڭعىستاۋ وبلىسى اكىمدىگى اكسياعا قولداۋ ءبىلدىرىپ، وبلىس ورتالىعى سەمەي قالاسىنا دوستىق ءۇيىن سالىپ بەرۋ ءۇشىن ارنايى دەلەگاسيا جىبەرىپ وتىر. وزدەرىڭىزبەن جۇزدەسىپ وتىرعانىما قۋانىشتىمىن. بۇگىنگى كەزدەسۋ ەلىمىزدىڭ قوس قيىرىنىڭ بىرلىگى مەن ۇلتتىق بىرەگەيلىگىنىڭ جارقىن كورىنىسى دەپ بىلەمىن. ماڭعىستاۋ مەن اباي وبلىسى باتىس پەن شىعىس شەكارادا جاتقان شالعاي ايماق بولسا دا، نيەتى ورتاق، تىلەۋى ءبىر ەكەنىن كورسەتتى. ماڭعىستاۋ حالقىنا، مەملەكەت باسشىسىنىڭ باستاماسىن العاشقى بولىپ قولداعان ماڭعىستاۋ وبلىسىنىڭ اكىمى نۇرداۋلەت يگىلىكۇلىنا ايرىقشا العىس ايتامىز»، - دەدى ايماق باسشىسى.
وبلىس اكىمى «ابايعا قۇرمەت» اكسياسىن ەلىمىزدىڭ بارلىق وڭىرلەرى قىزۋ قولداپ جاتقانىن، تۇركىستان، اقتوبە، قىزىلوردا، پاۆلودار، جەتىسۋ، الماتى، سولتۇستىك قازاقستان، شىعىس قازاقستان، باتىس قازاقستان، اتىراۋ، جامبىل، اقمولا وبلىستارى مەن شىمكەنت، الماتى، استانا قالالارى ءتيىستى جۇمىستاردى باستاپ كەتكەنىن ايتتى. ماڭعىستاۋ وبلىسى اكىمىنىڭ ءبىرىنشى ورىنباسارى ەربول ىزبەرگەنوۆ مۇنايلى ولكە جۇرتىنىڭ سالەمىن جەتكىزدى.
«كورشىسى شارۋا باستاپ جاتسا، قاسىنان قۇر ءوتىپ كەتپەيتىن قازاقپىز عوي. ءار وبلىستىڭ تارتۋ جاساۋى وتە دۇرىس قابىلدانعان شەشىم دەپ ەسەپتەيمىز. ويتكەنى بۇل نىساندار حالىقتىڭ يگىلىگىنە جۇمىس ىستەيتىن بولادى. يگى باستامالارىڭىزعا ساتتىلىك تىلەيمىز» دەدى ول.
كەزدەسۋدەن كەيىن ماڭعىستاۋلىق دەلەگاسيا 75 مىڭ تۇرعىنعا ارنالعان «Semey Smart City» شاعىن اۋدانى سالىناتىن قۇرىلىس الاڭىنا باردى. وبلىس اكىمى قوناقتارعا جاڭا ىقشام اۋداننىڭ جوباسىن تانىستىردى.
«بۇل جاڭا ىقشام اۋداندى 17 مامىردا وبلىستىڭ الداعى دامۋ جوسپارىن جاريالاعاندا تانىستىرعانبىز. ماڭايى قاراعايلى ورمان، تازا اۋا، ەرتىس وزەنىنەن 44 مەتر بيىكتىكتە ورنالاسقان. جاڭا ىقشام اۋدان سەمەي قالاسىنىڭ جاڭا كەلبەتى بولاتىنى انىق. «ابايعا قۇرمەت» اكسياسى اياسىنداعى عيماراتتار نەگىزىنەن وسى اۋداندا سالىنادى. قازىرگى تاڭدا دايىندىق جۇمىستارىن جۇرگىزىپ جاتىرمىز. كيەلى ماڭعىستاۋ جەرىنەن، بەكەت اتا ەلىنەن كەلگەن ازاماتتاردىڭ ءبىرىنشى بولىپ كەلىپ، قۇرىلىس الاڭىن كورىپ جاتقانىن جاقسىلىققا جورىپ تۇرمىز»، - دەدى ايماق باسشىسى.
مىڭ گەكتاردان استام اۋماقتى قامتيتىن ىقشام اۋداندا تۇرعىن ءۇي كەشەندەرى، 40-تان استام اكىمشىلىك، كوممەرسيالىق جانە الەۋمەتتىك نىساندار، ساياباقتار بوي كوتەرەدى. جوبا اياسىندا بولاشاقتا جاستار سارايى، جەكپە جەك سارايى، عالىمدار ءۇيى، مەديا ورتالىق، كورمە ورتالىعى، دوستىق ءۇيى، ينۆەستورلار ورتالىعى، مۋزىكالىق مەكتەپ، فيلارمونيا، ەتنوساياباق، ستاديون، كوللەدج، مۋزەي، بالاباقشالار، قوناقۇيلەر مەن ساۋدا كەشەندەرىن سالۋ جوسپارلانىپ وتىر.
