اباي اتىنداعى قازاق ۇلتتىق پەداگوگيكالىق ۋنيۆەرسيتەتى مەن كەنتاۋ قالاسىنىڭ ءبىلىم ءبولىمى ىنتىماقتاستىق تۋرالى مەموراندۋمعا قول قويدى. مەموراندۋمنىڭ ماقساتى – ءبىلىم بەرۋ سالاسىن دامىتۋعا، پەداگوگتاردىڭ بىلىكتىلىگىن ارتتىرۋعا جانە عىلىمي زەرتتەۋلەردى جەتىلدىرۋگە باعىتتالعان ارىپتەستىكتى نىعايتۋ جانە بىرلەسكەن جوبالاردى جۇزەگە اسىرۋ، – دەپ حابارلايدى Dalanews.kz.
مەموراندۋم بىرلەسكەن ءبىلىم بەرۋ باعدارلامالارىن ازىرلەۋ، عىلىمي زەرتتەۋلەردى ۇيىمداستىرۋ، كونفەرەنسيالار مەن سەمينارلارعا قاتىسۋ، تاجىريبە جانە اقپارات الماسۋ سياقتى ءبىرقاتار نەگىزگى باستامالاردى قامتيدى. بۇل باستامالار جەتەكشى پەداگوگيكالىق جوعارى وقۋ ورنى مەن كەنتاۋ قالاسىنىڭ ءبىلىم بەرۋ مەكەمەلەرى اراسىنداعى ءوزارا بايلانىستى نىعايتۋعا جاڭا مۇمكىندىكتەر اشادى.
كەزدەسۋ بارىسىندا اباي ۋنيۆەرسيتەتىنىڭ اكادەميالىق قىزمەتى جونىندەگى پرورەكتورى بانۋ ناربەكوۆا مەن كەنتاۋ قالاسىنىڭ ءبىلىم ءبولىمىنىڭ باسشىسى ءادىل اۋەلبەكوۆ ىنتىماقتاستىق تۋرالى مەموراندۋمعا قول قويدى. ءىس-شاراعا كەنتاۋ قالاسىنىڭ ءبىلىم بەرۋ مەكەمەلەرىنىڭ وكىلدەرى: باقىتجان ادىلبەكوۆ، ايگۇل ماجكۇلبەكوۆا، عازيزا قالىشبەتوۆا، فاريدا ساپاربايەۆا، گۇلجاناحان تاجىمبەتوۆا، رۇستەم شلەكەي، باحرام ميرزايەۆ، ايگۇل ارىستانبەكوۆا، نازگۇل بارشابەكوۆا، ايسۇلۋ سەيدالييەۆا، شاحيستا سادانوۆا مەن عابدۋللا گامۋرزاكوۆ قاتىستى. ەكى تاراپتىڭ وكىلدەرى تاجىريبەلەرىمەن ءبولىسىپ، ىنتىماقتاستىقتى ودان ءارى دامىتۋ بويىنشا ۇسىنىستارىن ءبىلدىردى.
پرورەكتور بانۋ ناربەكوۆا جاڭا فورماسياداعى پەداگوگ كادرلاردى دايارلاۋ جانە مەكتەپ مۇعالىمدەرىنىڭ بىلىكتىلىگىن ارتتىرۋ باعىتىنداعى باستامالار مەن اتقارىلىپ جاتقان جۇمىستارعا كەڭىنەن توقتالدى.
– بۇل مەموراندۋم ۋنيۆەرسيتەت پەن مەكتەپ اراسىنداعى ىنتىماقتاستىقتى نىعايتۋداعى ماڭىزدى قادام بولىپ تابىلادى. مەملەكەت باسشىسىنىڭ جولداۋىندا مەكتەپتەردىڭ ءبىلىم بەرۋ الەۋەتىن دامىتۋدا شەشۋشى ءرول اتقاراتىن بىلىكتى مامانداردىڭ ماڭىزدىلىعىنا باسا نازار اۋدارىلىپ، مۇعالىمدەردىڭ بىلىكتىلىگىن ارتتىرۋ قاجەتتىگى ايتىلدى. پەداگوگ ماماندىعىنىڭ مارتەبەسىن كوتەرۋ ءۇشىن تەك تەرەڭ ءبىلىم عانا ەمەس، سونىمەن قاتار ۇنەمى دامۋ، سونىمەن قاتار ءبىلىم بەرۋ ورتاسىنداعى وزگەرىستەرگە دايىن بولۋ ماڭىزدى. پەداگوگتاردىڭ بىلىكتىلىگىن ارتتىرۋ جانە قايتا دايارلاۋ سالاسىنداعى ىنتىماقتاستىعىمىز ناقتى ءارى وڭ ناتيجە بەرەتىنىنە سەنىمدىمىز، – دەدى پرورەكتور.
ىنتىماقتاستىق اياسىنداعى باستامالاردى جۇزەگە اسىرۋ ءبىلىم ساپاسىن دامىتۋدا جانە ءوڭىر ءۇشىن جاڭا ءبىلىم بەرۋ مۇمكىندىكتەرىن قۇرۋدا ماڭىزدى قادام بولماق.
