بۇگىن ەلىمىزدىڭ جەتەكشى جوعارى وقۋ ورنىندا اباي اتىنداعى قازۇپۋ مەن الماتى قالاسى ءبىلىم باسقارماسى اراسىنداعى ىنتىماقتاستىق تۋرالى مەموراندۋمعا قول قويۋ ءراسىمى ءوتتى، – دەپ حابارلايدى Dalanews.kz.
ءىس-شاراعا ۋنيۆەرسيتەتتىڭ باسقارما توراعاسى-رەكتورى بولات تىلەپ، الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا، ناۋرىزباي، تۇركسىب، مەدەۋ، الاتاۋ، جەتىسۋ، بوستاندىق، اۋەزوۆ جانە المالى اۋداندارىنىڭ ءبىلىم بولىمدەرىنىڭ باسشىلارى، ۋنيۆەرسيتەتتىڭ اكادەميالىق باعىتقا جاۋاپتى قۇرىلىمدىق بولىمشەلەرىنىڭ باسشىلارى قاتىستى.
بولات تىلەپ ەلىمىزدەگى ورتا ءبىلىم بەرۋ ۇيىمدارىمەن ىنتىماقتاستىقتى نىعايتۋعا باعىتتالعان كەزدەسۋدىڭ ماڭىزدىلىعىن اتاپ ءوتتى.
ۋنيۆەرسيتەت باسشىسى اباي ۋنيۆەرسيتەتىنىڭ قىزمەتى مەن جەتىستىكتەرىنە كەڭىنەن توقتالىپ، جوعارى وقۋ ورنى مەن ورتا ءبىلىم بەرۋ ۇيىمدارىنىڭ ىنتىماقتاستىعى اياسىندا 14 مەكتەپتە جۇزەگە اسىرىلىپ جاتقان «پەداگوگيكالىق سىنىپ» جوباسىنىڭ ناتيجەلەرىمەن ءبولىستى.
سونداي-اق ەلىمىزدەگى قالا مەن اۋىل مەكتەپتەرى اراسىنداعى الشاقتىق ماسەلەسىنە توقتالىپ، «جايلى مەكتەپ» جوباسى اياسىندا پەداگوگيكالىق كادرلار تاپشىلىعىن جويۋ، مۇعالىمدەردىڭ ءبىلىم ساپاسى مەن بىلىكتىلىگىن ارتتىرۋ، تۇلەكتەردى جۇمىسپەن قامتۋ، ق ر وڭىرلەرىن بىلىكتى پەداگوگ كادرلارمەن قامتاماسىز ەتۋ باعىتىنداعى جوسپارلارىمەن ءبولىستى.
الماتى قالاسى ءبىلىم باسقارماسىنىڭ وكىلدەرىمەن كەزدەسۋ بارىسىندا جوعارى جانە ورتا ءبىلىم بەرۋ سالاسىنداعى وزەكتى ماسەلەلەر تالقىلانىپ، ۇلتتىق بايانداماداعى ماڭىزدى باستامالار مەن «جايلى مەكتەپ» جوباسىن جۇزەگە اسىرۋداعى باستى مىندەتتەردى ورىنداۋ، مەملەكەتتىك جانە جەكەمەنشىك مەكتەپتەردەگى ءمۇعالىم تاپشىلىعىن جويۋ، جاڭا فورماسياداعى پەداگوگ ماماندارىن دايارلاۋ، پەداگوگيكالىق سىنىپتار سانىن ارتتىرۋ، ارنايى وقۋ ورىندارىندا ينكليۋزيۆتى ءبىلىم بەرۋدى كۇشەيتۋ جانە ماماندارمەن قامتاماسىز ەتۋ، اكادەميالىق جانە عىلىم باعىتتارىندا تاجىريبە الماسۋدى كەڭەيتۋ جولدارى قاراستىرىلدى.
پەداگوگيكالىق سىنىپتار الماتى قالاسىنىڭ ءبىلىم باسقارماسىنىڭ 14 ورتا ءبىلىم بەرۋ ۇيىمدارىندا تابىستى جۇزەگە اسىرىلىپ، وندا 200-دەن استام وقۋشى ءبىلىم الىپ جاتقاندىعى اتاپ ءوتىلدى. سونىمەن قاتار، الماتىنىڭ 16 جالپى ورتا ءبىلىم بەرۋ ۇيىمدارىندا اباي ۋنيۆەرسيتەتى كافەدرالارىنىڭ 21 فيليالى اشىلدى.
ىنتىماقتاستىق تۋرالى مەموراندۋمعا قول قويۋ ۋنيۆەرسيتەت پەن ءبىلىم باسقارماسى اراسىنداعى ارىپتەستىكتى نىعايتۋداعى ماڭىزدى قادام بولىپ تابىلادى. بۇل سونداي-اق ەلىمىزدىڭ ءبىلىم بەرۋ جۇيەسى ءۇشىن ستراتەگيالىق ماقسات بولىپ تابىلاتىن ءبىلىم بەرۋ ساپاسىن جاقسارتۋعا جانە بولاشاق پەداگوگتاردى دايارلاۋعا ىقپال ەتەدى.
