توتەنشە جاعداي قىزمەتى ماماندارىنا ارنالعان تەحنيكا رەسپۋبليكالىق جانە وبلىستىق بيۋدجەتتەن بولىنگەن قاراجات ەسەبىنەن ساتىپ الىنعان.
جاڭا كولىكتەر ادام ءومىرى مەن مۇلكىن ساقتاپ قالۋعا قاجەتتى زاماناۋي ءورت ءسوندىرۋ، جەدەل مەديسينالىق، بايلانىس جانە ناۆيگاسيالىق قۇرالدارمەن، جوعارى ءتيىمدى ءورت ءسوندىرۋ جۇيەلەرىمەن جابدىقتالعان.
نۇرلان ۇرانحايەۆ ماماندىق وكىلدەرىن شىن جۇرەكتەن قۇتتىقتاپ، ولاردىڭ جانكەشتى ەڭبەكتەرىن اتاپ ءوتتى.
– انتىنا ادال، سەرتىنە بەرىك، ەل تاعدىرىن ءوز تاعدىرىنان بيىك قويىپ، ەرلىكتىڭ جارقىن ۇلگىسىن كورسەتكەن سالا قىزمەتكەرلەرىنە زور العىسىمدى بىلدىرەمىن! سىزدەردىڭ ەڭبەكتەرىڭىز قۇرمەتكە لايىق! ارينە، قىزمەتكەرلەردىڭ تۇرمىس ساپاسىن جاقسارتىپ، قولداۋ شارالارىن كورسەتۋ قاجەت.
ءبىز وعان ءارقاشان دا ءازىرمىز! كاسىبي مەرەكە قارساڭىندا، بارشاڭىزعا مىقتى دەنساۋلىق، وتباسىلارىڭىزعا اماندىق، بەرەكە-بىرلىك تىلەيمىن! باتىرلىق پەن العىرلىقتى ءبىر ارناعا توعىستىرعان قىزمەتتە ءارقاشان ابىروي بيىگىنەن كورىنە بەرىڭىزدەر! – دەپ قۇتتىقتادى وبلىس باسشىسى.
شارا اياسىندا جاس وفيسەرلەر ماقتاۋ قاعازدارى مەن العىس حاتتارمەن ماراپاتتالدى.
2023 جىلدىڭ باسىنان بەرى اباي وبلىسىندا 847 توتەنشە جاعداي تىركەلدى. ونىڭ ىشىندە 612 جاعداي وندىرىستىك جانە تۇرمىستىق ورتكە قاتىستى. بيىلعى جىلدىڭ 9 ايىندا قۇتقارۋشىلار 2106-دان استام اۆاريالىق-قۇتقارۋ جۇمىستارىن جۇرگىزىپ، توتەنشە جاعدايلاردا كەلتىرىلگەن شىعىندى ازايتۋعا بارىنشا كومەكتەستى. سونداي-اق، 309 ەرەسەك ادام مەن 43 بالا قۇتقارىلدى.
