اباي وبلىسىندا پرەزيدەنت قاسىم-جومارت توقايەۆتىڭ تاپسىرمالارى اياسىندا حالىقتى ساپالى اۋىز سۋمەن قامتاماسىز ەتۋ بويىنشا جوبالاردى ىسكە اسىرۋ جالعاسۋدا. ءوڭىر اكىمى بەرىك ءۋالي ۇكىمەت وتىرىسى بارىسىندا بۇگىنگى تاڭدا اۋىز سۋمەن قامتاماسىز ەتۋ دەڭگەيى 93،4%، ونىڭ ىشىندە قالالاردا - 94،2%، اۋىلداردا - 93،1% قۇرايتىنىن باياندادى، - دەپ حابارلايدى Dalanews.kz

320 اۋىلدىق ەلدى مەكەننىڭ 171ء-ى ورتالىقتاندىرىلعان سۋمەن قامتاماسىز ەتىلگەن، 99-ىندا بلوك-مودۋلدەر ورناتىلعان، تاعى 24 ەلدى مەكەن سۋدى جەرگىلىكتى سۋ كوزدەرىنەن الادى. ال 39،4 مىڭ ادام سۋعا قول جەتكىزە الماي وتىر.

«مەملەكەت باسشىسىنىڭ حالىقتى تازا اۋىز سۋمەن 100% قامتاماسىز ەتۋ جونىندەگى تاپسىرمالارىن ورىنداۋ اياسىندا اباي وبلىسىندا 14،4 ملرد تەڭگەگە 37 جوبا ىسكە اسىرىلۋدا»،— دەدى اكىم.

ونىڭ ىشىندە، جالپى سوماسى 10،7 ملرد تەڭگە بولاتىن 19 جوبا ۇكىمەتتىڭ قولداۋىمەن جۇزەگە اسۋدا. 6،2 ملرد تەڭگە سوماسىنداعى تاعى ءۇش جوبا وبلىستىق بيۋدجەت قاراجاتى ەسەبىنەن باستالدى، بۇگىندە ونىڭ 620 ملن تەڭگەسى ءبولىندى. قۇرىلىس جۇمىستارى جۇرگىزىلۋدە.

قوسىمشا قارجىلاندىرۋ ماسەلەسى سالالىق مينيسترلىكتەرمەن كەلىسىلەدى. بەرىك ءۋالي وسى جوبالاردىڭ بارلىعىن ىسكە اسىرۋ جانە پايدالانۋعا بەرۋ وڭىردەگى سۋمەن جابدىقتاۋ ماسەلەسىن تولىعىمەن شەشۋگە مۇمكىندىك بەرەتىنىن اتاپ ءوتتى.