5 ساۋىردە ساعات 20:35-تە ءۇبى وزەنىندەگى مۇز كەپتەلىسىنەن سۋ دەڭگەيى كوتەرىلۋىنە بايلانىستى بورودۋليحا اۋدانىنداعى كراسنىي يار اۋىلىنداعى وزەنگە جاقىن ءبىر كوشەنىڭ اۋلالارىن سۋ باسۋ ءقاۋپى تۋىنداعان، – دەپ حابارلايدى Dalanews.kz.

وبلىستىق اكىمدىك مالىمەتىنشە، توتەنشە جاعدايلار قىزمەتى، جەرگىلىكتى اتقارۋشى ورگاندار، جەدەل قۇتقارۋ جاساعى مەن پوليسيا بولىمشەلەرىنەن بارلىعى 123 ادام جانە 39 تەحنيكا، ونىڭ ىشىندە 3 ءجۇزۋ قۇرالى اۋىلعا شوعىرلاندىرىلعان.

"قاۋىپسىزدىك ماقساتىندا اۋىلداعى وزەن جاعاسىنا جاقىن كوشەنىڭ 26 تۇرعىنى ءوز ەرىكتەرىمەن مەكتەپكە ۋاقىتشا ورنالاستىرىلدى. جەرگىلىكتى اتقارۋشى ورگانداردىڭ وكىلدەرى اۋلالارىن سۋ باسۋى مۇمكىن تۇرعىنداردىڭ مالدارىن باسقا شارۋا قوجالىقتارىنا جەتكىزدى. وبلىس اكىمى بەرىك ءۋالي بورودۋليحا اۋدانىنا ارنايى كەلدى. توتەنشە جاعدايلار دەپارتامەنتى باستىعى ماناربەك شاپاعاتوۆپەن بىرگە اۋەلى ءۇبى وزەنىندەگى سۋ دەڭگەيىن تىكۇشاق ارقىلى اۋەدەن باقىلادى. سودان كەيىن اۋىلعا كەلىپ، جەدەل شتابتىڭ جيىنىن وتكىزدى"، - دەپ جازىلعان حابارلامادا.

توتەنشە جاعدايلار دەپارتامەنتى باستىعىنىڭ ورىنباسارى ازامات ورىمبايەۆ پەن اۋدان اكىمى ايدار يبرايەۆ ايماق باسشىسىنا احۋالدى بايانداعان. اۋدان اكىمىنىڭ ايتۋىنشا، ەلدى مەكەندەگى وزەن جاعاسىنا جاقىن 30 شاقتى ءۇيدىڭ اۋلاسىنا سۋ كىرگەن.

ەلدى مەكەندە جەدەل شتاب قۇرىلعان. وعان وبلىس اكىمىنىڭ ورىنباسارى ديميتريي گاريكوۆ جەتەكشىلىك ەتەدى. ءۇبى وزەنىندەگى مۇز كەپتەلىسىن جويىپ، سۋ ارناسىن تولىق اشۋ ءۇشىن مۇز جارۋ جۇمىسى جۇرگىزىلىپ جاتىر.

اۋىلداعى باسقا اۋلالارعا سۋدىڭ كىرۋىنە جول بەرمەس ءۇشىن ءتيىستى جۇمىستار اتقارىلىپ جاتىر. ايماق باسشىسى ءتيىستى ورىندارعا جاعدايدى قاتاڭ باقىلاۋدا ۇستاۋدى تاپسىردى.

"كراسنىي يار - اۋدانداعى جىل سايىن سۋ باسۋ ءقاۋپى تونەتىن اۋىلداردىڭ ءبىرى. ەلدى مەكەندەگى جاعدايدى كەشەدەن بەرى جەكە باقىلاۋىمدا ۇستاپ وتىرمىن. اۋدان اكىمى مەن ءتيىستى قۇرىلىمدارعا تۇرعىندارعا تۇسىنىكتەمە جۇمىستارىن جۇرگىزۋدى، جاعدايدى ۇنەمى باقىلاۋدا ۇستاۋدى تاپسىرامىن. مۇز جارۋ جۇمىسىن كەشكە دەيىن اياقتاۋ قاجەت"، - دەدى ايماق باسشىسى.