سالتاناتتى جيىندا ءسوز سويلەگەن وبلىس اكىمى اماندىق باتالوۆ كاسىبي مەرەكەمەن قۇتتىقتاپ، مادەنيەت سالاسىنىڭ قوعام ومىرىندەگى ماڭىزىنا توقتالىپ ءوتتى.
– مادەنيەت – ۇلتتىڭ قۋاتى، عاسىرلار بويى ۇزىلمەي كەلە جاتقان رۋحاني بولمىسى، اقىل-وي، پاراساتى. ەلباسىمىز نۇرسۇلتان ءابىش ۇلى: «مادەنيەت – ەلدىڭ ەڭ باستى رۋحاني بايلىعى، اسىل مۇراسى. قاي ەلدىڭ مادەنيەتى مىقتى دامىسا، سول ەلدىڭ ەڭسەسى دە بيىك بولادى» دەپ اتاپ ءوتىپ، «ەۋرازيانىڭ ەڭ ءبىر باي دا بىرەگەي مادەنيەتى – قازاق مادەنيەتى» دەگەن ەدى. حالىققا ساپالى مادەني قىزمەت كورسەتۋ ءۇشىن سالانىڭ ماتەريالدىق-تەحنيكالىق بازاسىن نىعايتۋ باستى نازارىمىزدا. مادەنيەت سالاسىن دامىتا وتىرىپ جانە سىزدەردەي زيالى قاۋىم، ونەر ادامدارىن قۇرمەتتەي وتىرىپ، ءبىز جاستاردى تاربيەلەيمىز، – دەدى ا. باتالوۆ.
قۇتتىقتاۋ سوزدەن كەيىن وبلىس باسشىسى ماراپاتتاۋ راسىمىنە كوشتى. «ۇزدىك مادەنيەت ءۇيى»، «ۇزدىك كىتاپحانا»، «ۇزدىك مۋزەي»، «ۇزدىك ونەر ۇجىمى»، «ۇزدىك «حالىقتىق»، «ۇلگىلى» ۇجىم»، «ۇزدىك تەاتر ءارتىسى»، «ۇزدىك قولونەر شەبەرى»، «ۇزدىك وبلىستىق مادەنيەت مەكەمەسى» نوميناسيالارى بويىنشا جۇلدەگەرلەر ماراپاتتالدى. اتاپ ايتقاندا قاپشاعاي قالالىق كىتاپحاناسى، ب. ريموۆا اتىنداعى وبلىستىق دراما تەاترىنىڭ ءارتىسى ساندۋعاش مۇڭايتباسوۆا، قاراتال اۋدانىنداعى «التىناي» ۇلگىلى بي ءانسامبلى، تەكەلى قالالىق مادەنيەت ءۇيى جانە باسقا دا ۇجىمدار ۇزدىكتەر قاتارىنان كورىنىپ، ارنايى ديپلومدار مەن 100 مىڭ تەڭگەنىڭ سەرتيفيكاتىنا يە بولدى. تالدىقورعانداعى كوركەمسۋرەت گالەرەياسى ۇزدىك وبلىستىق مادەنيەت مەكەمەسى اتانىپ، «Lada Largus» اۆتوكولىگىنىڭ كىلتىن الدى.
سونىمەن قاتار 18 ازامات «ۇزدىك مادەنيەت قىزمەتكەرى» اتانسا، ءبىرقاتار قىزمەتكەرلەر «مادەنيەت سالاسىنىڭ ۇزدىگى» توسبەلگىسىمەن، ءتۇرلى دارەجەدەگى قۇرمەت گراموتالارىمەن، العىس حاتتارمەن ماراپاتتالدى. جالپى وسى كۇنى 50-دەن استام مادەنيەت قىزمەتكەرلەرىنە ماراپاتتار ۇسىنىلدى.
سالا ماماندارى اتىنان ق ر سۋرەتشىلەر وداعىنىڭ الماتى وبلىستىق فيليالىنىڭ باسشىسى، سالا ارداگەرى ءجۇنىسحان ەرمۇحان، ب. ريموۆا اتىنداعى وبلىستىق دراما تەاترىنىڭ ءارتىسى ايگەرىم بەكبولاتوۆا جانە باسقا دا ازاماتتار ءسوز الىپ، ارىپتەستەرىنە قۇتتىقتاۋ تىلەكتەرىن جەتكىزدى.
سالتاناتتى شارا «ونەر – وشپەس مۇرا» اتتى كونسەرتتىك باعدارلامامەن جالعاستى.
كاسىبي مەرەكە مادەنيەت ءۇيىندىڭ فويەسىندە قويىلعان مادەنيەت سالاسىنىڭ جەتىستىكتەرى تۋرالى كورمەنى تاماشالاۋمەن باستالعانىن اتاپ ءوتۋ كەرەك.
جالپى ءوڭىردىڭ مادەنيەت سالاسىنىڭ بيۋدجەتى 2015-16 جىلدارعا قاراعاندا 40 پايىزعا ءوسىپ، بيىلعى جىلى 7،6 ملرد تەڭگەنى قۇراپ وتىر. مادەني نىسانداردىڭ كۇردەلى جوندەۋ جۇمىستارى مەن جوبالىق سمەتالىق قۇجاتتارىن جاساتۋعا بارلىعى 870،2 ملن. تەڭگە ءبولىندى. دراما تەاترىنىڭ جاڭا عيماراتىنىڭ قۇرىلىسىنا 2 ملرد. 600 ملن. تەڭگە قارجى قاراستىرىلىپ، جۇمىستار ءجۇرىپ جاتىر.
