ايتا كەتسەك ق ر دەنساۋلىق ساقتاۋ ءمينيسترى ەلجان ءبىرتانوۆ بۇكىل ەلىمىز بويىنشا 30 مىڭنان استام دارىگەر ۇستەمەاقى الاتىنىن حابارلاعان ەدى.
دەنساۋلىق ساقتاۋ سالاسىنداعى قىزمەتكەرلەردى قارجىلىق تۇرعىدا قولداۋدى ۇيىمداستىرىپ، قوسىمشا اقىنى ءبولىپ بەرۋ ماقساتىندا وبلىستارداعى جەرگىلىكتى اتقارۋشى ورگاندار ءتيىستى كوميسسيانى قۇرعان ەدى. مەملەكەتتىڭ قولداۋىنا يە بولعان دارىگەرلەر العىسىن ايتۋدا. «اسا ءقاۋىپتى» ساناتقا ەنەتىن دارىگەرلەر 850 مىڭ تەڭگە ۇستەمەاقىعا قول جەتكىزەتىنى بەلگىلى.
سونىڭ ءبىرى – ەلورداداعى №3 قالالىق كوپبەيىندى بالالار اۋرۋحاناسىنىڭ دارىگەرى اينۇر وماروۆا. Qazaqstan ۇلتتىق ارناسى ارقىلى ول 20 كۇن بويى جۇمىستا جۇرگەنىن جەتكىزدى.
«ەكى بالامدى وسى 20 كۇن بويى كورگەن جوقپىن. ولاردى جازدا دەمالىسقا اپارۋعا ۋادە بەرگەنمىن. وسى الىنعان اشقانى يپوتەكالىق باستاپقى تولەمگە جۇمسايمىن»، - دەيدى ول.
بالالار جۇقپالى اۋرۋحاناسىندا اسا ءقاۋىپتى ءبىرىنشى ساناتتا 6 دارىگەر قىزمەت ەتەدى. قاۋىپتىلىگى ورتاشا ەكىنشى ساناتتا 3 مامان. ناۋرىز ايىنداعى جالاقىلارىنا ەسەلەپ اقشا العان ولاردىڭ العىسى شەكسىز.
«ءوز اتىمنان جانە وسى جەردەگى دارىگەرلەردىڭ ءبارىنىڭ اتىنان مينيسترلىككە العىس بىلدىرەمىن. قيىن كەزدە ءبىزدىڭ جانىمىزدا بولدى. پسيحولوگيالىق كومەك كورسەتتى. وعان قوسا ەڭبەگىمىزدى ەلەپ، قارجىلاي قولداۋ بىلدىرگەنى – زور قۋانىشقا كەنەلتىپ وتىر»، - دەيدى اتالمىش اۋرۋحانانىڭ تاعى ءبىر دارىگەرى يننا ياكوۆەنكو.
ۇستەمە قاراجات 3 اي قاتارىنان بەرىلەدى. بۇل دارىگەرلەر ءۇشىن ۇلكەن دەمەۋ.
ءقازىر ولاردىڭ جۇمىسى قيىنداماسا، جەڭىلدەگەن جوق. سەبەبى ساقتىق شارالارىن قاتاڭ ساقتاپ ەپيدەميانى تاراتپاۋ ءۇشىن ولار بارىن سالۋدا. ۇيلەرىنە قاشان قايتاتىنى دا ازىرگە بەلگىسىز.
