قاتەرلى دەرتكە دۋشار بولسا دا، ەمدەلىپ شىعامىز دەگەن سەرتكە بەرىك بالالاردى «سامۇرىق-قازىنا» قورىنىڭ وكىلدەرى استانا مەن الماتىدا مەرەكەمەن قۇتتىقتادى.
ءبىزدىڭ ەلدە «ۇلكەندى سەن سىيلاساڭ، كىشى سەنى سىيلايدى. كىشىنى سەن سىيلاساڭ كىسى سەنى سىيلايدى»، - دەيتىن كەرەمەت ءسوز بار. بۇگىنگى كەزدەسۋلەر وسى ءسوز بەن تۇسىنىكتىڭ تەرەڭدىگىن ەسكە ءتۇسىردى.
«سامۇرىق-قازىنا» اق كومپانيالار توبى قايىرىمدىلىق قىزمەتىنىڭ ءبىرىڭعاي وپەراتورى – «Samruk-Kazyna Trust» قورىنىڭ باستاماسىمەن ۇيىمداستىرىلعان شارادا استاناداعى انا مەن بالا ۇلتتىق عىلىمي ورتالىعى مەن الماتى قالاسىنداعى پەدياتريا جانە بالالار حيرۋرگياسى عىلىمي ورتالىعىندا وڭالتۋدان ءوتىپ جاتقان 310 بالاعا جاڭا جىلدىق سىيلىقتار مەن سەرتيفيكاتتار تارتۋ ەتىلدى.
ماسەلەن، بۇگىن الماتىداعى ورتالىقتا ونكولوگيالىق اۋرۋلارى بار 155 بالا ەم الىپ جاتىر. وسى كىشكەنتايلارىمىزدى ەنشىلەس كومپانيالار اتىنان قوردىڭ قوعاممەن بايلانىس، الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ جاڭا جىلدىق سەرتيفيكاتتار تابىستاپ، اتا-انالارىمەن تىلدەستى.
«ءقازىر ەلىمىزدە مەديسينا سالاسى جوعارى دەڭگەيدە. مىقتى قۇرال-جابدىقتار بار. دارىگەرلەرىمىز دە وتە بىلىكتى. سوندىقتان وسى سىناقتان تەز ءوتىپ، ومىرلەرىڭىزدە جارقىن كەزەڭدەر مول بولسىن!»، - دەدى عيبرات اۋعانوۆ.
ءدال وسى كۇنى استانا قالاسىنىڭ انا مەن بالا ۇلتتىق عىلىمي ورتالىعى دا جاڭاجىلدىق كوڭىل-كۇيگە بولەندى. بۇل جەردە دە وڭالتۋدان ءوتىپ جاتقان 155 بالاعا دا ارنايى سەرتيفيكاتتار سىيلاندى.
قۇنى 50 000 تەڭگە سەرتيفيكاتتار ارقىلى اتا-انالار بالالارىمەن اقىلداسىپ، وزدەرى تاڭداعان كەز-كەلگەن سىيلىقتى «دبالالار الەمى» دۇكەندەر جەلىسىنەن ساتىپ الا الادى.
سونىمەن قاتار، ەلورداداعى پسيحولوگيالىق-پەداگوگيكالىق تۇزەتۋ كابينەتىندە تاربيەلەنۋشى 500 ەرەكشە بالا دا سىيلىقسىز قالمادى. ولاردى تاڭەرتەڭگىلىكتە كومپانيالار توبىنداعى ەڭبەك ۇجىمدارى اتىنان قۇتتىقتاعان «Samruk-Kazyna Trust» قورىنىڭ باس ديرەكتورى الفيا ادييەۆا جەتكىنشەكتەرگە تاتتىلەر جيىنتىعىن ۇلەستىردى.
«ارماندار ورىندالۋ كەرەك. ال ءبىز، ەرەسەكتەر، بۇل جولدا بارىنشا كۇش سالاتىن بولامىز. ءبارى مۇمكىن، تەك ارمانداي بىلىڭدەر. بارشاڭا مىقتى دەنساۋلىق پەن عاجايىپقا سەنىم تىلەيمىن»، - دەدى الفيا ادييەۆا.
قايىرىمدىلىقتىڭ باسىم باعىتتارى دەنساۋلىق ساقتاۋ، ءبىلىم بەرۋ، بۇقارالىق سپورتتى دامىتۋ جانە ازاماتتاردىڭ الەۋمەتتىك وسال توپتارىن قولداۋعا نەگىزدەلگەن.
