شىمكەنتتە اسا ءىرى كولەمدەگى الاياقتىق ءىسى بويىنشا حالىقارالىق ىزدەۋدە بولعان ايەل ۇستالدى، دەپ حابارلايدى Dalanews.kz.
تەرگەۋ دەرەگىنشە، كۇدىكتى شىمكەنت قالاسىنىڭ تۇرعىندارىنا قاتىستى بىرنەشە الاياقتىق ەپيزودقا قاتىسى بار. كەلتىرىلگەن جالپى شىعىن كولەمى 80 ملن تەڭگەدەن اسادى.
پوليسيا مالىمەتىنشە، ەپيزودتاردىڭ بىرىندە كۇدىكتى زەرگەرلىك بۇيىمدار ساتۋمەن اينالىساتىن كاسىپكەر ايەلدىڭ سەنىمىنە كىرىپ، التىن اشەكەيلەردى يەمدەنىپ كەتكەن. الايدا العان مىندەتتەمەلەرىن ورىنداماعان.
سونداي-اق ايەل ازاماتتارعا شەتەلگە ارزان تۋريستىك جولدامالار ۇسىنعان. الدىن الا تولەم العانىمەن، ساپارلار ۇيىمداستىرىلماعان، ال قاراجات جابىرلەنۋشىلەرگە قايتارىلماعان.
جەدەل ىزدەستىرۋ شارالارى ناتيجەسىندە كۇدىكتى ۇستالىپ، ۋاقىتشا ۇستاۋ يزولياتورىنا قامالدى. قازىرگى ۋاقىتتا ءىس بويىنشا تەرگەۋ امالدارى جالعاسىپ جاتىر.
