بۇگىن بالالاردى قورعاۋ كۇنى قونايەۆتا ەرەكشە، كەڭ اۋقىمدا تويلاندى. الدىمەن قالا اكىمى اسحات بەردىحانوۆ ەمحانادا ەم قابىلداپ جاتقان بالاپانداردى قۇتتىقتاپ شىقتى، دەپ حابارلايدى Dalanews.kz.
كەيىننەن ورتالىق الاڭدا گالا-كونسەرت قويىلدى. شارا بالاباقشا تۇلەكتەرى، ءبىرقاتار جەتىستىكتەرگە جەتكەن وقۋشىلاردان، سپورتشىلاردان، «جاس سارباز»، «جاس پوليسەي» سىنىپتارىنىڭ وقۋشىلارىنان قۇرىلعان شەرۋمەن اشىلدى. كەيىننەن ءبيشى بالاقايلار ءتۇرلى ۇلت وكىلدەرىنىڭ ءبيىن بيلەدى.
گۇلدەي جايقالعان بيشىلەردەن كەيىن قالا اكىمى تۇرعىنداردى مەرەكەمەن قۇتتىقتادى.
«بۇگىنگى كۇنى وبلىس ورتالىعىندا 22 مىڭنان استام بالالارىمىز بار. ولاردىڭ اراسىنداعى ءوڭىرىمىزدىڭ نامىسىن قورعاپ، ۇلكەن دودالاردا جەرلەستەرىن قۋانتىپ، جىل باسىنان 100-دەن اسا مەدالعا يە بولعان جاس سپورتشىلارىمىزدى ماقتانىشپەن ايتا الامىز. قونايەۆتا جالپى 13 290 وقۋشىمىز ءبىلىم السا، ولاردىڭ اراسىندا وبلىستىق، رەسپۋبليكالىق جانە حالىقارالىق دارەجەلەردەگى ءتۇرلى بايقاۋلار مەن عىلىمي جوبالاردا دا 500-دەن استام وقۋشىلارىمىز جۇلدەلى ورىندارعا قول جەتكىزدى. بۇل – ۇلكەن جەتىستىك. بارشاڭىزدى مەرەكەمەن قۇتتىقتايمىن!» – دەدى اسحات بەردىحانوۆ.
كەيىننەن ول مۇمكىندىگى شەكتەۋلى جاسوسپىرىمدەرگە قۇرمەت كورسەتىپ، سىي-سياپات تابىس ەتتى. ايتا كەتەيىك، بۇگىن شاھار باسشىسىنىڭ اتىنان 600 بالاعا سىيلىق، مەكتەپ وقۋشىلارىنا 1000 بالمۇزداق تاراتىلدى.
كونسەرت بارىسىندا كۇي شەرتىلىپ، ءان ايتىلدى. سۋرەتشى، تىگىنشى، قولونەرشى بالاقايلاردىڭ شىعارماشىلىعىنان كورمە قويىلدى. جاس جەتكىنشەكتەردىڭ تانىمىن كەڭەيتۋ ماقساتىندا توتەنشەلىكتەر ارنايى تەحنيكادان كورمە ۇيىمداستىردى. ءورت ءسوندىرۋشى ماماندىعى جايىندا وقۋشىلارعا اقپارات بەردى.
سونداي-اق وتباسىلىق ويىندار وتكىزىلىپ، بالالار الاڭدا شاحمات وينادى، ۆولەيبول، باسكەتبول، بوكس سەكىلدى سپورت تۇرلەرىنەن قويىلىم كورسەتىلدى.
جالپى مەرەكەلىك ءىس-شارا 3 ساعاتقا جالعاستى. سالتاناتتى كەشكە 1500-نان استام بالا قاتىستى.
