قاراساي اۋدانىندا اۋقىمدى ينۆەستيسيالىق جوبالار جۇزەگە اسىرىلۋدا. مۇندا جاڭا وندىرىستەر اشىلىپ، لوگيستيكالىق ورتالىقتار ىسكە قوسىلىپ، مىڭداعان جۇمىس ورنى اشىلىپ جاتىر. بۇل اۋدان ەكونوميكاسىنىڭ دامۋىنا جانە بيزنەسپەن اينالىسۋعا جاعدايدى جاقسارتۋعا سەرپىن بەرەدى،- دەپ حابارلايدى Dalanews.kz
ەڭ ءىرى جوبالاردىڭ ءبىرى — وڭتۇستىككورەيالىق KT&G كومپانياسىنىڭ تەمەكى ونىمدەرىن شىعاراتىن زاۋىتى. زاۋىتتىڭ جىلدىق ءونىمى 177 ميلليارد تەڭگە سوماعا جوسپارلانعان. مۇندا 180 ادام جۇمىس ىستەيدى.
لوگيستيكا سالاسى دا بەلسەندى دامۋدا. «فوكۋس لوگيستيك» كەشەنىنىڭ ءبىرىنشى كەزەڭى اياقتالىپ، OZON قويماسى اشىلدى، بۇل 250 ادامدى جۇمىسپەن قامتاماسىز ەتتى. ناۋرىز ايىندا UNION قويماسى ىسكە قوسىلادى، ول تاعى 100 جۇمىس ورنىن اشادى. «Imagine Apple City» جوباسى اياسىندا 500 جاڭا جۇمىس ورنى پايدا بولادى.
جالپى العاندا، اۋدان بويىنشا 4500 جۇمىس ورنى اشىلادى دەپ جوسپارلانىپ وتىر.
قاراساي اۋدانى تەك شەتەلدىك ەمەس، سونىمەن قاتار وتاندىق كومپانيالاردى دا تارتىپ جاتىر. الكوگولسىز سۋسىندار ءوندىرۋشى Caspian Beverage Holding («بۋراتينو» برەندى) الماتىدان زاۋىتىن كوشىرمەك. بۇل اۋداننىڭ ونەركاسىپتىك الەۋەتىن ارتتىرىپ، قوسىمشا جۇمىس ورىندارىن اشادى.
«اۋىل اماناتى» باعدارلاماسى اياسىندا 106 جوبانى قولداۋعا 928 ميلليون تەڭگە ءبولىندى. اۋداندا سۋ ۇنەمدەيتىن تەحنولوگيالار ەنگىزىلۋدە، قايتا وڭدەۋ كاسىپورىندارى مەن اگروبيزنەس دامىپ جاتىر.
اۋداندا مەكتەپتەر، مەديسينالىق مەكەمەلەر جانە مادەني نىساندار سالىنىپ جاتىر:
2025 جىلى المالىباقتا 1500 ورىندىق، بۇلاقتىدا 900 ورىندىق مەكتەپتەر اشىلادى؛
جىبەك جولى مەن ايتەيدە مادەنيەت ۇيلەرى پايدا بولادى؛
اباي مەن ۇشتەرەك اۋىلدارىندا دارىگەرلىك امبۋلاتوريالار سالىنىپ جاتىر.
«ينۆەستيسيا تارتۋ — اۋداننىڭ دامۋى ءۇشىن ماڭىزدى مىندەت. جاڭا كاسىپورىندار تەك قارجى قۇيىپ قانا قويماي، جۇمىس ورىندارىن دا اشادى. بۇل ءبىزدىڭ جۇمىستىڭ باستى باسىمدىعى»، — دەپ اتاپ ءوتتى قاراساي اۋدانىنىڭ اكىمى جاسۇلان ەستەنوۆ.
