بۇل قىلمىستىق ءىس قوعامدا رەزونانس تۋدىردى. سونىمەن قاتار، كوپشىلىكتى ونىڭ بىرنەشە جىل بويى قىلمىستىق ىستەرمەن جالعىز اينالىسقانى تاڭعالدىردى.

سوت وتىرىسى بارىسىندا سۋديا الييەۆا بيۋدجەت قاراجاتىن اسا ءىرى مولشەردە ۇرلاۋعا اكەپ سوقتىرعان سەبەپتەردى انىقتادى. 2019-2023 جىلدار ارالىعىندا №55 مەكتەپتە بيۋدجەت قاراجاتىن ماقساتسىز پايدالانۋ تۇرعىسىنان بىردە-بىر مەملەكەتتىك اۋديت جۇرگىزىلمەگەنى بەلگىلى بولدى. سونداي-اق، 8 جىلعا جۋىق ۋاقىت ىشىندە مەملەكەتتىك اۋديت بۇل وقۋ ورنىندا بىردە-بىر جوسپارلى تەكسەرىس جۇرگىزبەگەن.

سوت قارجى مينيسترلىگىنە مۇنداي جاعدايلار قايتالانباۋى ءۇشىن شارالار قابىلداۋدى تالاپ ەتىپ، جەكە قاۋلى شىعاردى.

ايتا كەتەيىك، بۇعان دەيىن اقتوبەدە №55 مەكتەپ گيمنازياسىنىڭ باس بۋحگالتەرى سوتتالعان ەدى. 

ول اسا ءىرى مولشەردە بيۋدجەت قاراجاتىن جىمقىرعانى ءۇشىن كىنالى دەپ تانىلدى. جاۋاپتى تۇلعا 8 جىل بويى ءوزىنىڭ بانك شوتىنا جالاقى رەتىندە زاڭسىز اۋدارىمدار جاساعان، ناتيجەسىندە مەملەكەتكە 413،8 ميلليون تەڭگە سوماسىندا زالال كەلتىرگەن.

تەك ءبىر جىل ىشىندە ول وزىنە 200 ميلليون تەڭگەدەن اسا قاراجات اۋدارعان، بۇل - بۇكىل مەكتەپتىڭ جىلدىق ەڭبەكاقى قورىنىڭ 30 پايىزى. 

سوت ۇكىمىمەن وعان 7 جىل باس بوستاندىعىنان ايىرۋ جازاسى تاعايىندالدى، سونداي-اق، 10 جىل مەرزىمگە ماتەريالدىق جاۋاپتى لاۋازىمداردى اتقارۋ قۇقىعىنان ايىرىلدى.