قىرىق جىل بويى كۇردەلى جوندەۋ كورمەگەن سەمەيدىڭ اۋەجايى 2018 جىلدىڭ ءبىرىنشى جارتىسىندا تولىق ىسكە قوسىلادى. بۇل تۋرالى شىعىس قازاقستان وبلىسىنىڭ اكىمى دانيال احمەتوۆ جۇمىس ساپارى بارىسىندا ءمالىم ەتتى.
قازىرگى تاڭدا ۇشىپ-قونۋ جولاعى جاڭارتىلدى. جۇمىس كەستەگە ساي قىزۋ ءجۇرىپ جاتىر. جىل باسىنان 4،8 ملرد تەڭگە يگەرىلگەن.
– از ۋاقىت بۇرىن كۇردەلى ءىستى قولعا الدىق. ەندى كەلەر جىلدىڭ ماۋسىمىنان باستاپ سەمەيلىكتەر عانا ەمەس، جاقىن ماڭداعى اۋدان تۇرعىندارى دا جوعارى قاۋىپسىزدىك تالاپتارىنا تولىق جاۋاپ بەرەتىن اۋەجايدان ۇشۋ مۇمكىندىگىنە يە بولادى. بۇل جەر سونداي-اق، قالاداعى ماڭىزدى ينفراقۇرىلىم قاتارىن تولىقتىرادى. وعان سەنىم زور، – دەدى ايماق باسشىسى.
دانيال احمەتوۆ اۋەجاي تولىق جوندەلگەننەن كەيىن ۇشۋ گەوگرافياسى ارتاتىنىن ايتتى. تاريح تاعلىمىندا ويىپ تۇرىپ ورىن الار سەمەي ءۇشىن بۇل تۋريستەر تارتۋعا مول مۇمكىندىك بەرەرى ءسوزسىز.
كەزەكتى جۇمىس ساپارى بارىسىندا قالاداعى سونى وزگەرىستەردى شىعىس قازاقستان وبلىسىنىڭ اكىمى دانيال احمەتوۆ بارىنشا باعامدادى. بيىل سەمەيدىڭ جولدارىندا ورتا جوندەۋ جۇمىستارى قىزۋ جۇرگىزىلدى. 23 شاقىرىم قاشىقتىققا اسفالت توسەلىپ، 8 ورتالىق كوشە جاڭارتىلدى.
جول توسەنىشىن سالۋ ءۇشىن 1 ملرد. 260 ميلليون تەڭگە ءبولىندى. وتكەن جىلمەن سالىستىرعاندا قاراجات كولەمى 78 پايىزعا ەسەلەنگەن. ونىڭ ىشىندە ورتا جوندەۋ جۇمىستارىنا 900 ميلليوننان استام قاراجات، 70 كوشەدەگى اعىمداعى جۇمىستارعا 290 ميلليون تەڭگە جۇمسالدى.
– وتكەن كوكتەمدە جولدار جاسالىنادى دەپ ايتقان ەدىك. ناتيجەنى كورىپ تۇرسىزدار. 23 شاقىرىم جول جوندەلدى. ءبىر جازدىڭ ىشىندە وسىنشا جولدى قالپىنا كەلتىرۋ جۇمىستارى سەمەيدە قاشان جۇرگىزىلىپ ەدى؟ – دەدى وبلىس اكىمى.
دانيال احمەتوۆ سونداي-اق، كەلەسى جىلى قالانىڭ تاعى 25 شاقىرىم جولىنا اسفالت توسەلىپ، اباتتاندىرۋ جۇمىستارى جالعاساتىنىن ايتتى. ايتا كەتۋ كەرەك، الداعى بەس جىلدا سەمەيدىڭ ينفراقۇرىلىم جەلىسى دە جاقسارتىلىپ، جاڭارتىلادى.
شىعىس قازاقستان وبلىسىنىڭ اكىمى دانيال احمەتوۆ سەمەي قالاسىنداعى ءىس-ساپارى بارىسىندا وڭىردەگى ەڭ ماڭىزدى دەنساۋلىق ساقتاۋ نىساندارىنىڭ بىرىندە بولدى. وكىنىشكە وراي، مەكەمە جابدىقتالۋىندا كەتكەن كەمشىلىكتەر كەسىرىنەن ءالى كۇنگە دەيىن ىسكە قوسىلماي تۇر.
كەزەكتى تەكسەرۋ كەزىندە سۇيىق راديواكتيۆتى قالدىقتاردى ساقتاۋعا ارنالعان جابدىقتىڭ شىمكەنتتەگى كاسىپورىنداردىڭ بىرىندە ازىرلەنگەنى انىقتالدى. ال جوبا بويىنشا ول گەرمانيادان الىنۋى ءتيىس ەدى. وسىلاي، ساپاسى تالاپقا ساي ەمەس جابدىق – كۇننىڭ باستى پروبلەماسى بولىپ وتىر. ىسكە جاۋاپسىز كەلگەندەر قاتارىندا قۇراستىرۋ جۇرگىزگەن كاسىپورىن دا بار. ونىڭ راديواكتيۆتى زاتتارمەن جۇمىس جۇرگىزۋگە ءتىپتى رۇقسات قاعازى بولماعان. جىرى بىتپەگەن مەكەمەدەگى جاعدايدى كەزەكتى رەت سىنعا العان ايماق باسشىسى ماسەلەنى تۇبەگەيلى شەشۋدى تاپسىردى.
– ليسەنزيا مىندەتتى تۇردە بولۋى ءتيىس. ءبىراق ونى ەشكىم تەكسەرمەگەن. ال جابدىق بولسا، تالاپقا ساي ەمەس. ءبىز ءۇشىن حالىقتىڭ قاۋىپسىزدىگى ءبىرىنشى ورىندا، سوندىقتان ونى مىندەتتى تۇردە اۋىستىرامىز، – دەدى وبلىس اكىمى دانيال احمەتوۆ.
ايماق باسشىسىنىڭ تاپسىرماسىنا ساي، قازىرگى تاڭدا يادرولىق ورتالىقتاعى ولقىلىقتىڭ ورنىن تولتىرىپ، پروبلەمانى شەشۋدىڭ بىرنەشە جولى قاراستىرىلۋدا.
شقو اكىمىنىڭ باسپا ءسوز قىزمەتى
https://dalanews.kz/30258
