پرەمەر-مينيستر ولجاس بەكتەنوۆ Skyhansa كومپانياسىنىڭ تەڭ قۇرىلتايشىسى جانە ديرەكتورلار كەڭەسىنىڭ مۇشەسى، دوكتور كريستين گروتسباحپەن كەزدەسۋ وتكىزدى. وندا جەتىسۋ وبلىسىنداعى «قورعاس» حالىقارالىق شەكارا ماڭى ىنتىماقتاستىق ورتالىعى ماڭىندا جۇك جانە جولاۋشىلار اۋەجايىن سالۋ جوباسىن جۇزەگە اسىرۋ ماسەلەلەرى تالقىلاندى،- دەپ حابارلايدى Dalanews.kz

«قورعاس-شىعىس قاقپاسى» اەا-داعى حالىقارالىق جۇك جانە جولاۋشىلار اۋەجايىنىڭ جوباسى ICAO حالىقارالىق ۇسىنىمدارىنا سايكەس اۆياسيالىق ينفراقۇرىلىم سالۋدىڭ ءۇش كەزەڭدى باعدارلاماسىن كوزدەيدى. ءبىرىنشى كەزەڭ شەڭبەرىندە 2027 جىلعا دەيىن:

• وتكىزۋ مۇمكىندىگى ساعاتىنا 50 ادامعا دەيىن جولاۋشىلار تەرمينالىن (2032 جىلعا قاراي – ساعاتىنا 500 ادامعا دەيىن)؛

• JET A-1 اۆياوتىنى جاڭا ءتۇرىنىڭ زاماناۋي وتىن قويماسىنىڭ كولەمى جىلىنا 200 مىڭ تونناعا دەيىن (2032 جىلعا قاراي – 550 مىڭ تونناعا دەيىن)؛

• اۆتوتۇراعى جانە جىلىنا 50 مىڭ توننا تەمىرجول تۇيىعى بار جۇك تەرمينالىن (2032 جىلعا قاراي – جىلىنا 250 مىڭ تونناعا دەيىن) سالۋ جوسپارلانۋدا.

ەكىنشى جانە ءۇشىنشى كەزەڭدەر شەڭبەرىندە 2032 جىلعا دەيىن تۋريستىك جانە ويىن-ساۋىق ينفراقۇرىلىمى دا قۇرىلادى. ينۆەستيسيالاردىڭ جالپى كولەمى شامامەن 250 ملرد تەڭگەنى قۇرايدى.

سونداي-اق جوبادا Air–Rail–Auto-Air جۇك تاسىمالدارىنىڭ مۋلتيمودالدى سىزباسىن ازىرلەۋ جانە ازيا-تىنىق مۇحيتى ايماعى باعىتىنداعى كولىك جانە لوگيستيكالىق مارشرۋتتاردىڭ تۇيىسكەن جەرىندە ەكونوميكالىق ءوسۋدىڭ جاڭا مۇمكىندىكتەرىن اشۋ كوزدەلگەن.

«پرەزيدەنت قاسىم-جومارت توقايەۆ قازاقستان ەكونوميكاسى قۇرىلىمىن ءارتاراپتاندىرۋ جونىندەگى اۋقىمدى جۇمىس شەڭبەرىندە كولىك-لوگيستيكا سالاسىن باسىم باعىتتاردىڭ ءبىرى رەتىندە اتادى. جەتىسۋ وبلىسىندا زاماناۋي اۋەجاي سالۋ جوباسىن جۇزەگە اسىرۋ ينفراقۇرىلىمدى دامىتۋعا ەلەۋلى سەرپىن بەرەدى جانە قازاقستاننىڭ جۇڭگو، ورتالىق ازيا جانە ەۋروپا اراسىنداعى ترانزيتتىك حاب رەتىندەگى ءرولىن نىعايتادى»، — دەپ اتاپ ءوتتى پرەمەر-مينيستر ولجاس بەكتەنوۆ.

ءوز كەزەگىندە Skyhansa كومپانياسىنىڭ تەڭ قۇرىلتايشىسى، ديرەكتورلار كەڭەسىنىڭ مۇشەسى، دوكتور كريستين گروتسباح جوبانىڭ اۆياسيالىق ينفراقۇرىلىمدى دامىتۋعا عانا ەمەس، سونىمەن قاتار وڭىردە زاماناۋي لوگيستيكالىق جانە ىسكەرلىك ورتالىق قالىپتاستىرۋعا باعىتتالعانىن اتاپ ءوتتى.

«ءبىز جاي عانا اۋەجاي ەمەس، حالىقارالىق دەڭگەيدەگى دامىعان ينفراقۇرىلىمى: جۇك جانە جولاۋشىلار تەرمينالدارى، جانارماي قۇيۋ كەشەنى، اۋە كەمەلەرىنە اۆياسيالىق-تەحنيكالىق قىزمەت كورسەتۋ ورتالىعى (MRO)، بيزنەس ورتالىعى، مۋلتيمودالدى لوگيستيكالىق مۇمكىندىكتەرگە ارنالعان قوناق ۇيلەرى بار كوپفۋنكسيونالدى وڭىرلىك حاب قۇرىپ جاتىرمىز. ونىڭ قىتايمەن شەكاراعا جاقىن ورنالاسۋى «قورعاس – شىعىس قاقپاسى» اەا شەڭبەرىندە حالىقارالىق ساۋدانى دامىتۋعا قولايلى جاعداي جاسايدى، ال ونىڭ تەمىرجول جانە اۆتوجول جەلىلەرىنە قوسىلۋى جاڭا جىبەك جولىنداعى كەلەشەگى زور لوگيستيكالىق توراپتاردىڭ بىرىنە اينالدىرادى»، — دەپ اتاپ ءوتتى دوكتور كريستين گروتسباح.

كەزدەسۋ سوڭىندا ق ر كولىك مينيسترلىگى مەن Skyhansa اراسىندا ينۆەستيسيالار تۋرالى كەلىسىمگە قول قويىلدى. قۇجاتقا سايكەس، ينۆەستور قاجەتتى اۆياسيالىق ينفراقۇرىلىم قۇرىلىسىن، نەگىزىنەن وتاندىق ماتەريالدار مەن قىزمەتتەردى پايدالانۋدى، سونداي-اق جوبانى جۇزەگە اسىرۋعا قىزمەتكەرلەردىڭ كەمىندە 90%-ى قازاقستان ازاماتتارى بولۋىن قامتاماسىز ەتۋگە مىندەتتەلەدى.

قازاقستاندىق تاراپ ينجەنەرلىك جانە كولىك ينفراقۇرىلىمىن تارتىپ، سونداي-اق ارنايى ەكونوميكالىق ايماققا قاتىسۋشىلارعا ماقساتتى جەڭىلدىكتەر بەرەدى.

ەسكە سالايىق، جوبا Skyhansa بىرلەسكەن قازاقستاندىق-گەرماندىق كاسىپورنىنىڭ قاتىسۋىمەن جۇزەگە اسىرىلۋدا. گەرمانيا تاراپىنان سەرىكتەس رەتىندە اۆياسيالىق تەرمينالدار مەن ينفراقۇرىلىمدى دامىتۋ بويىنشا جوعارى قىزمەت كورسەتەتىن The Hansa Consortium كومپانياسى، قازاقستان تاراپىنان – قازاقستان، ورتالىق ازيا جانە كاۆكاز نارىعىنداعى اۋەجايلار ءۇشىن كەشەندى قىزمەتتەر مەن ينجينيرينگتىك شەشىمدەر ۇسىناتىن Skymax Technologies كومپانيالار توبى ارەكەت ەتەدى.