قازاقستان رەسپۋبليكاسى مەدەنيەت جەنە اقپارات مينيسترلٸگٸ 2025 جىلدىڭ I جارتىجىلدىعى بويىنشا قورىتىندىلاردى ۇسىنادى. اتاپ ايتقاندا, باق-تى تٸركەۋ مەن جاڭارتۋ, قۇقىققا قارسى كونتەنتپەن كٷرەس, حالىقارالىق ىنتىماقتاستىق, بٸرلەسكەن جوبالار جەنە تاراتۋ اياسىن كەڭٸتۋ مەسەلەلەرٸ قاراستىرىلادى,- دەپ حابارلايدى Dalanews.kz
باق-تى تٸركەۋ
رەسپۋبليكادا بارلىعى 4 871 بۇقارالىق اقپارات قۇرالى تٸركەلگەن. ونىڭ ٸشٸندە 3 002 مەرزٸمدٸ باسىلىم (گازەت, جۋرنال), 236 تەلەارنا, 98 راديو, 1 231 اقپارات اگەنتتٸگٸ مەن ونلاين-باسىلىم بار. 2025 جىلدىڭ I جارتىجىلدىعىندا باق رەەسترٸ جاڭارتىلىپ, ەل اۋماعىندا 140 باق قىزمەتٸن توقتاتىپ (59 گازەت, 62 جۋرنال, 19 ينتەرنەت-باسىلىم), تٸركەۋدەن شىعارىلدى.
«قۇقىققا قايشى كونتەنت» تاراتۋعا قارسى شارالار
جىل باسىنان بەرٸ ينتەرنەت جەلٸسٸنەن 74 130 زاڭعا قايشى ماتەريال انىقتالىپ, ولاردىڭ 36 667-ٸ جويىلعان. ونلاين پلاتفورمالاردان 49 896 ماتەريال تابىلىپ, ونىڭ 12 433-ٸ جويىلدى.
ورتاق جوبالار
«ەۆرازييا» ارناسى رەسەيلٸك «پەرۆىي كانال» ارناسىمەن بٸرلەسٸپ, قازاقستاندا «الليگاتور» اتتى 8 سەرييالى كٶركەم سەريال تٷسٸردٸ. بٷگٸندە «Qazaqstan» ارناسى تٷركييالىق «Kanal D» ارناسىمەن بٸرگە «قايتا ورالعان ٷمٸت» اتتى 100 سەرييالى تەلەحيكايانى جارىققا شىعارماق. «24KZ» ارناسى قىتايدىڭ CCTV‑4 ارناسىمەن «ورتالىق ازييا – قىتاي» سامميتٸ اياسىندا قازاقستان جايلى «ورتاق ٷي» («وبششيي دوم») اتتى دەرەكتٸ فيلمنٸڭ پرەمەراسىن ٶتكٸزدٸ. «حابار» ارناسىندا «ۇلى دالا مەن اسپان استى ەلٸ: كٶرشٸلەر, سەرٸكتەستەر, دوستار» اتتى دەرەكتٸ فيلم كٶرسەتٸلدٸ.
حالىقارالىق ىنتىماقتاستىق
Euronews-پەن سەرٸكتەستٸك اياسىندا «Modern Nomads» تەلەۆيزييالىق باعدارلاماسىنىڭ 12, «East West Connect» 6, «Voices from Central Asia» 6 شىعارىلىمى, «Focus» 3 رەپورتاجى ەزٸرلەندٸ. سونىمەن بٸرگە, 2025 جىلدىڭ ناۋرىز-ماۋسىم ايلارىندا Euronews Academy بٸلٸم بەرۋ جوباسى بويىنشا قازاقستاندا جۋرناليستيكا جەنە مەديامەنەدجمەنت باعىتتارىندا 4 كەسٸبي كۋرس ۇيىمداستىرىلدى.
تاراتۋ اياسىن كەڭٸتۋ
«سۇر تاباقشالار» ناۋقانى اياسىندا شەتەلدٸك سپۋتنيك قۇرىلعىلارىنا بالاما رەتٸندە وتاندىق سپۋتنيك اپپاراتتارىن ساتىپ الۋعا ىنتالاندىرۋ ماقساتىندا سۋبسيدييالاۋ باعدارلاماسى ٸسكە قوسىلدى. الماتى, جامبىل, تٷركٸستان وبلىستارىندا 300-دەن استام قۇرىلعى ساتىپ الۋ قۇنى سۋبسيدييالاندى. جاقىن ارادا شەكارالاس ايماقتاردا تۇرعىندار 3 000-نان استام اپپارات پايدالانادى دەپ جوسپارلانۋدا.
