پرەمەر-مينيستردىڭ بيۋدجەت-سالىق ساياساتىن رەفورمالاۋدىڭ جاڭا تاسىلدەرىن ازىرلەۋ تۋرالى تاپسىرماسىنا سايكەس ۆيسە-پرەمەر - ۇلتتىق ەكونوميكا ءمينيسترى سەرىك جۇمانعارين ۇەم جانىنداعى ساراپتامالىق كەڭەستىڭ ءبىرىنشى وتىرىسىن وتكىزدى، - دەپ حابارلايدى Dalanews.kz.

كەڭەس وتىرىسىنا قارجى ءمينيسترى ءمادي تاكييەۆ، ۇلتتىق بانك ءتوراعاسىنىڭ ورىنباسارى اقىلجان بايماعامبەتوۆ، ۇلتتىق ەكونوميكا ۆيسە-مينيسترى ازامات ءامرين، 20-دان اسا ساراپشى، ونىڭ ىشىندە، ءىرى قارجىلىق، ينۆەستيسيالىق، تالداۋ جانە كونسالتينگتىك ۇيىمداردىڭ، قازاقستان قارجىگەرلەر قاۋىمداستىعى كەڭەسىنىڭ، "اتامەكەن" ۇكپ باسشىلارى قاتىستى.

جيىنعا قاتىسۋشىلار بيۋدجەت تابىسىن ارتتىرۋ شارالارىن، جاڭا سالىق كودەكسىن ازىرلەۋ شەڭبەرىندە ۇسىنىلعان جاڭا شارالار كەشەنىن تالقىلادى.

قاتىسۋشىلاردىڭ كوپشىلىگى كودەكستىڭ جاڭا رەداكسياسىندا ۇسىنىلىپ وتىرعان ءبىرقاتار قولدانىستاعى سالىق جەڭىلدىگىن الىپ تاستاۋ، بانكتەر مەن قارجى ۇيىمدارى ءۇشىن كورپوراتيۆتىك تابىس سالىعىنىڭ (كتس) مولشەرلەمەسىن ارتتىرۋ، مەملەكەتتىك باعالى قاعازدار بويىنشا سىياقىلارعا سالىق سالۋدى ەنگىزۋ مەرزىمدەرىن 2030 جىلدان 2026 جىلعا اۋىستىرۋ، ويىن بيزنەسىنە سالىق سالۋدى قايتا قاراۋ جونىندەگى شارالارمەن كەلىستى. بۇل شارالار بيۋدجەتكە تۇسەتىن كىرىستى 1 ترلن تەڭگەدەن اسا مولشەردە ارتتىرۋعا ارنالعان.

"الايدا بۇل شارالار شىعىندار مەن بيۋدجەت كىرىستەرى اراسىنداعى قالىپتاسقان الشاقتىقتى جابۋ ءۇشىن جەتكىلىكسىز. كەڭەستە جىل سايىن بيۋدجەتكە تۇسەتىن سالماق ارتىپ كەلە جاتقانى، الەۋمەتتىك شىعىندار ءوسىپ جاتقانى، ال ەكونوميكانىڭ ناقتى سەكتورىن دامىتۋ بيۋدجەت شىعىستارىنىڭ 10%-ىنان ازى ەكەنى ايتىلدى"، - دەپ جازىلعان حابارلامادا.

سالىق-بيۋدجەت سالالارىندا رەفورمالارسىز جاعدايدى تۇزەۋ مۇمكىن ەمەس. كەزدەسۋگە قاتىسۋشىلار اقشا-نەسيە جانە فيسكالدىق ساياسات اراسىنداعى تەڭگەرىمسىزدىكتى تەڭەستىرۋ ءارى سالىق سالۋ جۇيەسىنىڭ تيىمدىلىگىن ارتتىرۋ بويىنشا ءوز پىكىرلەرى مەن ۇسىنىستارىن ورتاعا سالدى.

"2025 جىل قازاقستان ءۇشىن وڭاي بولمايدى. ءبىز وتكەن جىلدارداعى كەيىنگە قالدىرىلعان، ۇزاق ۋاقىتقا سوزىلعان رەفورمالاردى قابىلداۋعا ءماجبۇر بولامىز.

بۇل – مەملەكەت ءوزىنىڭ الەۋمەتتىك مىندەتتەمەلەرىن ورىنداۋدى جالعاستىرا الاتىنداي باعانى نارىقتىق جاعدايعا كەلتىرۋ. وكىنىشكە قاراي، ءقازىر سالىقتارعا قاتىستى جاعدايدى تۇزەتۋ، ولاردى اكىمشىلەندىرۋدى جاقسارتۋ، ءتىپتى كەيبىر جاعدايلاردا مولشەرلەمەلەردى قايتا قاراۋ ءۇشىن ءبىرقاتار تانىمال ەمەس رەفورمالاردى قابىلداۋىمىز كەرەك. ەڭ باستىسى مۇنى ۇلتتىق قوردى ساقتاۋ ءۇشىن ەمەس، ەكونوميكانىڭ نارىقتىق ەكونوميكاعا اينالۋى ءۇشىن جاساۋىمىز كەرەك. جاڭا سالىق كودەكسى، بۇگىن ءبىز تالقىلاعان ۇسىنىستاردىڭ كەيبىرى كوپ ۇزاماي كوپشىلىكتىڭ يگىلىگىنە اينالادى. مەن بارلىعىن ءوز پىكىرىن ايتۋعا شاقىرامىن"، - دەدى NAC Analytica كق (NU) باسقارما ءتوراعاسى راسۋل رىسمامبەتوۆ.