اقش دوللارى الدا دا قىمباتتاپ، 2025 جىلى ونىڭ باعامى شامامەن 500 تەڭگەگە دەيىن جەتۋى مۇمكىن. قازاقستان قارجىگەرلەرى قاۋىمداستىعى نارىق ساراپشىلارى اراسىندا جۇرگىزگەن ساۋالناما ناتيجەسى وسىنداي پايىمدى العا تارتادى، دەپ حابارلايدى Dalanews.kz.
"قاراشا ايىنىڭ باسىنا قاراي تەڭگەگە شاققاندا ءبىر دوللاردىڭ باعاسى 481،3 تەڭگە دەڭگەيىندە تۇراقتايدى دەپ بولجانادى، ال ءبىر اي بۇرىن ول 476،5 تەڭگە بولادى دەپ بولجانعان. سوعان قاراماستان 2024 جىلعى 9 قازانداعى رەسمي باعام 489،06 تەڭگەگە دەيىن جەتتى. سونىمەن قاتار، ءبىر جىلدان كەيىن ۇلتتىق ۆاليۋتا باعامى 500 تەڭگەگە جۋىقتاۋى مۇمكىن. ساراپشىلار وسى كەزەڭگە دەيىن ءبىر دوللار باعامى 498،4 تەڭگە دەڭگەيىندە ساقتالادى دەپ بولجايدى"، دەلىنگەن قازاقستان قارجىگەرلەرى قاۋىمداستىعىنىڭ (ققق) قازان ايىندا جۇرگىزگەن ساۋالناماسىندا.
"جەرگىلىكتى ۆاليۋتا نارىعىنداعى بالانستىڭ بۇزىلۋى قازاقستاندىق كومپانيالار مەن حالىق تاراپىنان، ونىڭ ىشىندە ءىرى ينفراقۇرىلىمدىق جوبالاردى ىسكە اسىرۋ اياسىندا شەتەل ۆاليۋتاسىنا دەگەن سۇرانىستىڭ ساقتالۋىمەن، سوعان بايلانىستى ۆاليۋتا ءتۇسىمىن كونۆەرتتەۋ كولەمىنىڭ قىسقارۋىمەن بايلانىستى بولۋى مۇمكىن"، دەلىنگەن زەرتتەۋدە.
سونىمەن قاتار، قارجى نارىعىنا قاتىسۋشىلار ينفلياسيالىق بولجامدى قايتا قاراستىرىپتى. وعان سايكەس،12 ايدان كەيىنگى تۇتىنىس باعاسىنىڭ ءوسىمى 8،1% بولۋى مۇمكىن، ال الدىڭعى بولجامداعى دەڭگەي 7،6% ەدى.
"تۇرعىن ءۇي كوممۋنالدىق شارۋاشىلىعى سالاسىنداعى رەفورما شەڭبەرىندە تاريفتەردىڭ ءوسۋى جانە فيسكالدىق ىنتالاندىرۋ كولەمىنىڭ ارتىپ كەلە جاتقانى سىندى قازاقستان ەكونوميكاسىندا ساقتالىپ وتىرعان ينفلياسيالىق فاكتورلار تۇتىنۋ باعالارانىڭ يندەكسىن (تبي) نىسانالى مانىنە - 5%-عا قايتارۋ ءۇشىن ۇلتتىق بانكتى قاتاڭ مونەتارلىق شارتتاردى ساقتاۋعا ماجبۇرلەيدى. دەمەك، ءبىر جىلدان كەيىن بازالىق سىياقى مولشەرلەمەسى 13% دەڭگەيىندە بولادى دەپ بولجانادى"، - دەيدى ساراپشىلار.
ايتا كەتسەك، قازىرگى ۋاقىتتا بازالىق سىياقى مولشەرلەمەسى 14،25% قۇرايدى. وسى اپتادا، 2024 جىلى 11 قازاندا ۇلتتىق بانك وسى كورسەتكىش بويىنشا كەزەكتى شەشىمىن جاريالاپ قالۋى ءتيىس.
قازاقستان قارجىگەرلەرى قاۋىمداستىعى ساۋالناماعا قاتىسۋشىلار اراسىندا بازالىق سىياقى مولشەرلەمەسىنىڭ قازىرگى دەڭگەيى ساقتالاتىنىن بولجاعانداردىڭ ۇلەسى 76%-عا دەيىن ارتقانىن باسا اتاپ ءوتتى.
سونىمەن، ساۋالناماعا قاتىسۋشىلار تاياۋ شىعىستاعى قاقتىعىستىڭ كۇشەيۋى مۇناي باعاسىنداعى قۇبىلمالىق سيپاتى ۇزاققا ساقتالاتىندىن بولجايدى.
"ولاردىڭ پايىمىنشا، الداعى 12 ايدا مۇناي باعاسىنىڭ ءبىر باررەلى 78،5 دوللار بولۋى مۇمكىن، بۇل قازىرگى دەڭگەيدەن اسا كوپ ەمەس. سونىمەن قاتار، ساراپشىلار مۇنايدىڭ باعاسىنىڭ جوعارى دەڭگەيدە ساقتالۋى، ءوندىرىس كولەمىن ارتتىرۋدى جوسپارلاۋ جانە فيسكالدىق ىنتالاندىرۋ ەلدەگى ەكونوميكالىق بەلسەندىلىكتى قولدايدى دەپ بولجايدى. سونداي-اق ءبىر جىلدان كەيىن ءجىو ءوسىمى 4،4% بولۋى مۇمكىن"، دەلىنگەن ساراپشىلار بولجامىندا.
ايتا كەتسەك، 10 قازاندا ۇلتتىق ەكونوميكا ۆيسە-مينيسترى ارمان قاسەنوۆ تەڭگەنىڭ قۇنسىزدانۋىنا نەگىز جوق ەكەنىن ايتتى. سونداي-اق ەكونوميكالىق ساراپشى ەل ازاماتتارىنا دۇربەلەڭگە سالىنىپ، دوللار ساتىپ الۋعا اسىقپاۋ كەرەكتىگىن ايتىپ، كەڭەس بەردى.
