2023 جىلعى 3 ناۋرىزدان باستاپ قازاقستاندا ەل ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىق تۋرالى زاڭ قولدانىسقا ەنگىزىلگەن. سول كەزدەن باستاپ ەلىمىزدە مەملەكەتتىك كىرىستەر ورگاندارى ارقىلى 28،4 مىڭ ازامات، سوت شەشىمى بويىنشا 196 ازامات بانكروت دەپ تانىلدى. مىندەتتەمەلەردىڭ جالپى سوماسى – 147،1 ملرد تەڭگە، دەپ حابارلايدى Dalanews.kz مەملەكەتتىك كىرىستەر كوميتەتىنە سىلتەمە جاساپ.
قۇزىرلى ۆەدومۆتو مالىمەتىنشە، تولەم قابىلەتتىلىگىن قالپىنا كەلتىرۋ ءراسىمىن 9،5 ملرد تەڭگە سوماسىنا 103 ازامات قولداندى، ونىڭ 8ء-ى بويىنشا قالپىنا كەلتىرۋ جوسپارلارى بەكىتىلدى.
"زاڭ ەنگىزىلگەن ساتتەن باستاپ حالىقتىڭ ودان حاباردار ەكەنى بايقالدى: 2024 جىلى 83 057 ءوتىنىش، 2025 جىلدىڭ 5 ايىندا 77 106 ءوتىنىش بەرىلدى"، دەلىنگەن مكك حابارلاماسىندا.
ايتا كەتسەك، 2024 جىلدىڭ 20 تامىزىنان باستاپ راسىمدەردى جەڭىلدەتۋگە باعىتتالعان تۇزەتۋلەر كۇشىنە ەندى:
- تولەم قابىلەتتىلىگىن قالپىنا كەلتىرۋ ءراسىمى مەرزىمى وتكەن جانە مۇلىك بولماعان كەزدە، ءبىراق تۇراقتى تابىس بولعان كەزدە قول جەتىمدى بولدى.
- سوتتان تىس بانكروتتىق ەندى ميكروقارجى جانە كوللەكتورلىق ۇيىمداردى قوسا العاندا، قارىز شارتتارى بويىنشا تالاپ ەتۋ قۇقىعى بار بارلىق ۇيىمدار الدىنداعى مىندەتتەمەلەر بويىنشا قولدانىلادى.
- ءوتىنىش بەرۋ ءتارتىبى جەڭىلدەتىلدى: كرەديتور مەن قارىز سوماسى تۋرالى مالىمەتتەردى كورسەتۋ، سونداي-اق قۇجاتتاردى قوسا بەرۋ قاجەتتىلىگى الىنىپ تاستالدى.
- وتەۋدىڭ بولماۋ مەرزىمىن ەسەپتەۋ ءتارتىبى ناقتىلاندى: 1 اەك-تەن كەم تولەمدەر وتەۋ بولىپ ەسەپتەلمەيدى، مەرزىم سوڭعى تولەم كۇنىنەن باستاپ ەسەپتەلەدى.
ەندى، 2025 جىلعى 1 قاڭتارعا دەيىن جاسالعان قارىز شارتتارى بويىنشا بورىشتى رەتتەۋدى جۇرگىزۋ تۋرالى تالاپتى الىپ تاستالماق. سونداي-اق:
- بورىشكەردىڭ سەبەبىن كورسەتپەي سوتتان تىس بانكروتتىق ءراسىمىن توقتاتۋ قۇقىعىن؛
- سوتتان تىس بانكروتتىق ءراسىمى اياقتالعاننان كەيىن كرەديتتىك بيۋرولار بازاسىندا كورسەتىلمەگەندەردى قوسا العاندا، بانكروتتىڭ قارجى ۇيىمدارى الدىنداعى بارلىق مىندەتتەمەلەرىن توقتاتۋىن كوزدەيتىن تۇزەتۋلەر قارالادى.
اتالعان تۇزەتۋلەر اعىمداعى جىلدىڭ سوڭىنا دەيىن ىسكە اسىرىلادى دەپ كۇتىلۋدە.
بۇعان دەيىن ءوزىن بانكروت دەپ تانۋدى سۇراعان 124 مىڭ ادامنىڭ 75 پايىزىنىڭ ءوتىنىشى قاناعاتتاندىرىلماعانىن جازعانبىز.
