جەكە ءوسۋ مەكتەبى – 6 جاستان 16 جاسقا دەيىنگى بالالار مەن جاسوسپىرىمدەردىڭ كوشباسشىلىق قاسيەتتەرىن قالىپتاستىرۋ جانە ولاردى «رۋحاني جاڭعىرۋ» قاعيداتتارى نەگىزىندە ءوزىن-وزى تانىتۋ بويىنشا ءبىلىم بەرۋ جوباسى.
باعدارلامانىڭ بىرەگەيلىگى – وقىتۋ جۇيەسى ويىن تاجىريبەسىن (گەيميفيكاسيا) قولدانۋ ارقىلى جۇزەگە اسىرىلادى. وقۋعا قازاق جانە ورىس ءتىلدى مەكتەپتەردىڭ وقۋشىلارى تارتىلادى. باستاپقىدا جوبا پيلوتتىق ۇلگىدە ەلوردالىق ءال-فارابي اتىنداعى وقۋشىلار سارايىنىڭ بازاسىندا جۇزەگە اسىرىلماق. كەيىن ءساتتى ىسكە جۇزەگە اسىپ، جەمىسىن بەرە باستاعان سوڭ جوبا ودان ءارى وڭىرلەرگە قاراي كوشىرىلەدى.
«ەلىمىز الەمنىڭ ەڭ دامىعان 30 ەلىنىڭ قاتارىنا كىرۋى ءۇشىن الدىنا اسقاق ماقساتتار قويىپ وتىر. مۇنىڭ جۇزەگە اسۋى ادامي كاپيتالدىڭ ساپاسىنا تىكەلەي بايلانىستى. ءبىز بۇگىنگى بالالاردىڭ كوشباسشىلىق الەۋەتىنىڭ وتە زور ەكەندىگىنە سەنىمدىمىز»، - دەدى «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ باسقارما ءتوراعاسى دانيار ەسين.
ءوز كەزەگىندە وقۋشىلار سارايى ديرەكتورىنىڭ مىندەتىن اتقارۋشى راۋشان كۋشيبايەۆا وسكەلەڭ ۇرپاق ءۇشىن اتالمىش مەموراندۋمنىڭ ماڭىزى جوعارى ەكەنىن ايتىپ، جاس بۋىننىڭ ساپالى دامۋىنا جاعداي جاسايتىندىعىن جەتكىزدى.
«رۋحاني جاڭعىرۋ» قازاقستاندىق قوعامدىق دامۋ ينستيتۋتىمەن سەرىكتەستىك باسەكەگە قابىلەتتى جاس قازاقستاندىقتاردى تاربيەلەۋ جولىندا جاڭا جوبالار اشۋعا مۇمكىندىك بەرەدى»، - دەدى راۋشان كۋشيبايەۆا.
سونىمەن قاتار، مەموراندۋم اياسىندا «رۋحاني جاڭعىرۋ» باعدارلاماسىنىڭ قاعيداتتارىن ەسكەرە وتىرىپ، ۆولونتەرلىك قوزعالىستى ۇيىمداستىرۋ، مەكتەپ ۇيىرمەلەرى مەن عىلىمي بىرلەستىكتەردىڭ جۇمىسىن جاقسارتۋ جونىندەگى ادىستەمەلىك ۇسىنىمدار دايىنداۋ ماسەلەلەرىندە، سونداي-اق قوعامدىق سانانى جاڭعىرتۋ سالاسىنداعى الەۋمەتتىك جوبالار مەن فورسايتتىق زەرتتەۋلەر اكسەلەراتورىنىڭ قىزمەتى شەڭبەرىندە ءوزارا ءىس-قيمىل بويىنشا ىنتىماقتاستىقتى جۇزەگە اسىراتىن بولادى
