رەسەيدىڭ ساۋەگەيلەرى دە ءپۋتيننىڭ ءسوزىن سويلەيدى. ءپۋتيننىڭ ويىنان شىعۋ ءۇشىن جورامالدى كرەملدىڭ كوڭىلىنە كەلمەيتىندەي جاسايدى ەكەن. تانىمال استرولوگ پاۆەل گلوبانىڭ كەلەر جىلعا ارنالعان بولجامىنا قاراپ كۇلدىك. بارىنەن بۇرىن ورىس حالقىنىڭ باقىتتان باسى اينالىپ جاتقان شىعار. بولجامشىنىڭ بىلجىراعىنا سەنگەن رەسەيدەگى اقپارات قۇرالدارى حالىقتان ءسۇيىنشى سۇراپ جاتىر. كۇلكىلى. ءيا، كۇلكىلى. سوندا گلوبا نە دەيدى؟
دوللار
“كەلەر جىل دوللارعا اۋىر سوعايىن دەپ تۇر. امەريكانىڭ اقشاسى قۇنىن جوعالتادى، “الەمدىك ۆاليۋتا” دەگەن اتىنان ايىرىلادى. ابىرويىنان دا… ەۋرو ما؟ ەۋرو تۇراقتايدى. وسى سەبەپتى دە جيعان-تەرگەندەرىڭىز بولسا، وسى ەۋروعا اۋىستىرىپ ۇلگەرىڭىزدەر”.
مۇناي
“قارا التىننىڭ “تامىرىنا قان جۇگىرەدى”. قۇنى وسەدى دەگەنىم عوي. وسىنىڭ ارقاسىندا رەسەيدىڭ ارى قاراعان بەتى، بەرى قارايدى. كرەمل قارجىلىق داعدارىستى ەڭسەرىپ شىعادى. مۇنىڭ مۇنايمەن بايلانىستى بولاتىنىن تۇسىنگەن شىعارسىز”.
“يران بۇلىنەدى”
كەلەر جىلدىڭ ەكىنشى جارتىسىندا الەم استاڭ-كەستەڭ بولادى. ءتىپتى، ءۇشىنشى دۇنيەجۇزىلىك سوعىس باستالىپ كەتۋى مۇمكىن. مۇسىلمان ەلى (بۇل يران بولۋى مۇمكىن) بۇلىك شىعارادى. پارسىلار تۇرىكتەرگە تاپ بەرەدى.
“پۋتين، سپاسي ي سوحراني”
ۋشىعىپ كەتۋگە ءازىر تۇرعان جاعدايدى رەسەي باقىلاۋىنا الادى. ونىڭ داناگوي كوسەمى وسى جاعدايعا ءادىل تورەلىك ەتىپ ءتيىستى شەشىم شىعارادى. ءوزىنىڭ اتاق-ابىرويى مەن ءاقىل-بىلىمىنىڭ ارقاسىندا پۋتين ءۇشىنشى دۇنيەجۇزىلىك سوعىستىڭ الدىن الادى.
ءدىن
2017 جىلى رەسەيدە جاڭا ءدىني قوزعالىس قۇرىلادى. اينالاسى بىرنەشە جىلدىڭ ىشىندە بۇل اعىم حريستيان جانە يسلام دىندەرىن “وتارلاپ”، ءبىرتۇتاس الەمدىك ءدىن دەگەن اتاققا يە بولادى. وسى اعىمنىڭ اياسىندا جاڭا كوزقاراستاعى بۋىن وسىپ-ونەدى.
وسى ارادان ءۇزىلىس جاسايىق. وسى اراعا دەيىن گلوبانى قالجىڭداپ وتىر ما دەپ ويلاعانبىز. جوق، قالجىڭى ەمەس ەكەن. الجىعانى ەكەن. الجىپتى. اقىلىنان اداسىپتى…
“قازاقستان رەسەيگە قوسىلادى”
2017 جىلى قازاقستان مەن بەلارۋس رەسەيدىڭ قولتىعىنا كىرگىسى كەلەتىنىن ايتادى. بەكەر ەمەس. رەسەيدىڭ كۇشى اسىپ-تاسىپ بارا جاتقانىن كورىپ وتىر عوي. “ءۇش مەملەكەتەن قۇرالعان دەرجاۆا” وزگەلەردىڭ توبەسىنەن قارايدى. ءتىپتى، امەريكا مەن ەۋرووداقتىڭ ءوزى بۇلاردىڭ جانىندا “ويىن بالاسى” بولىپ قالماق. اقش پەن باتىس “ءۇش مەملەكەتتەن قۇرالعان دەرجاۆانىڭ” كولەڭكەسىندە قالادى. ايبىندى دەرجاۆانىڭ داقپىرتى الىسقا جەتەدى. از ۋاقىتتان كەيىن بۇلارعا ءازىربايجان مەن ارمەنيا قوسىلادى.
“ءاي، شىركىن-اي…”
باتىستىڭ باسىنان ب ا ق تايادى. ەۋرووداقتىڭ ساپىنان شىققىسى كەلگەن ەلدەردىڭ سانى ارتادى. ەۋروپانىڭ اقشاسى ازايادى. كۇللى الەم كارى قۇرلىقتىڭ شاڭىراعى ورتاسىنا ءتۇسىپ، قيراعانىنىڭ كۋاسى بولادى.
وسى ارادان تاعى ءبىر ءۇزىلىس. گلوبا پۋتينگە قاتىستى پىكىرىن ايتىپتى. كەشىرىڭىزدەر، بولجامىن…
2020… "ءپۋتيننىڭ اقىرى"
رەسەيدە حالىق كوتەرىلەدى. داناگوي پۋتين ءوزىنىڭ ساليقالى ءارى سارابدال ساياساتىنىڭ ارقاسىندا تولقىنىستى 3 جىلعا دەيىن ۇستاپ تۇرادى. ءبىراق، ەشكىم جانە ەشنارسە ماڭگىلىك ەمەس. 2020 جىلى اۋرۋى اسقىنعان كرەملدىڭ كوسەمى جاعدايدى باقىلاۋدان قالادى. بۇقارانى باقىلاۋدان قالعان ءامىرشىنىڭ ىقپالى دا ازاياتىنى بەلگىلى.
قىسقاشا، وسى. گلوبا وسىلاي دەپتى. ءبىر جىلدىڭ ىشىندە الەمنىڭ استاڭ-كەستەڭ بولاتىن ءتۇرى بار. قازاق مۇندايدا “جاعىڭا جىلان جۇمىرتقالاسىن” دەۋشى ەدى…
2017god.com سايتىنان اۋدارىلدى
