بۇگىنگى اكسيا بارىسىندا ەلوردالىق ۆولونتەرلەر بايقوڭىر اۋدانىندا جالعىز تۇراتىن زەينەتكەرلەرگە، ۇوس، تىل ارداگەرلەرىنە كومەك كورسەتتى.
تەمىرلان ەسىمدى ۆولونتەردىڭ ايتۋىنشا، مۇنداي اكسيالار قاريالارعا قۇرمەت كورسەتۋدىڭ ءبىر بەلگىسى ەكەنىن ايتتى.
– جىل سايىن اۋدان اكىمىنىڭ باستاماسىمەن جالعىز تۇراتىن جانە كومەكككە مۇقتاج قاريالارعا كومەك كورسەتىلىپ كەلەدى. مەرەكە قارساڭىندا مۇنداي اكسيا قالا تۇرعىندارىن قۋانتاتىنى ءسوزسىز. ءۇي اۋلاسىنداعى قاردى تازالاۋ ارقىلى ۆولونتەرلەر قاريالاردىڭ اق باتاسىن الىپ جاتىر. ەلوردادا ءوتىپ جاتقان وسىنداي اكسيالارعا بارلىق ۆولونتەرلەردى قاتىسۋعا شاقىرامىن، – دەيدى ول.
يگى ءىس بارىسىندا قاريالارعا ازىق-تۇلىك سالىنعان سەبەت پەن شاعىن جاڭا جىلدىق تاتتىلەر تابىستالدى. قاريالار ءوز كەزەگىندە جاستارعا جاساعان قولعابىستارى ءۇشىن العىستارىن ءبىلدىردى.
– بۇگىن اۋلامنىڭ قارىن كۇرەپ بەردى. جەر ءۇي بولعاندىقتان قار باسىپ قالا بەرەدى. ۆولونتەرلەر كەلىپ، كومەك كورسەتىپ جاتىر. بىزگە، زەينەتكەرلەرگە قامقورلىق جاساپ جاتقان بايقوڭىر اۋدانى اكىمىنە جانە ۆولونتەرلەرگە العىسىمىز شەكسىز، – دەيدى قالا تۇرعىنى ليۋدميلا حلەستكينا.
قايىرىمدىلىق ءىس-شاراسى بارىسىندا ۆولونتەرلەر وسىنداي بىرنەشە مەكەنجايعا بارىپ، قار تازالادى. ۇيىمداستىرۋشىلاردىڭ ايتۋىنشا، ءداستۇرلى اكسيا ءالى دە جالعاسىن تابادى.
ايتا كەتەيىك، وسىعان دەيىن اۋا رايى قولايسىز كۇندەرى ۆولونتەرلەر ەلوردا كوشەلەرىندە كوممۋنالدىق قىزمەتكەرلەر مەن قالا تۇرعىندارىنا ىستىق شاي مەن باۋىرساق ۇلەستىرگەن بولاتىن.
