Алматыда электронды темекілерге толық тыйым салынғанына қарамастан, вейптердің заңсыз саудасы әшкереленді, деп хабарлайды Dala news.
Қала прокуратурасының үйлестіруімен Экономикалық тергеп-тексеру департаменті кезекті қылмыстық істі аяқтады. Тергеу барысында тыйым салынған өнім Telegram мессенджері мен әлеуметтік желілер арқылы жасырын сатылғаны анықталған.
Негізгі сату арналары ретінде «ESCOBAR OPTOM», «Snake opt» және өзге де Telegram-арналар қолданылған. Өнім қоймалар мен жасырын орындарда сақталған.
Тергеу нәтижесінде 180 мыңнан астам вейп тәркіленіп, жойылды. Сарапшылардың бағалауынша, олардың заңсыз сатылымынан түсуі мүмкін табыс 1 млрд теңгеден асуы ықтимал болған.
Сондай-ақ қоймалар мен өткізу нүктелері анықталып, күдіктілердің 347 млн теңге көлеміндегі мүлкіне тыйым салынды. Іс бойынша алты адам жауапкершілікке тартылып, қылмыстық іс сотқа жолданды.
Прокуратура 2024 жылдың маусымынан бастап Қазақстанда электронды темекілерді, оларға арналған сұйықтықтар мен хош иістендіргіштерді әкелуге, өндіруге, сатуға және таратуға тыйым салынғанын еске салды. Заңсыз айналым үшін қылмыстық жауапкершілік, соның ішінде бас бостандығынан айыру жазасы қарастырылған.
