Бірнеше жыл бұрын мектептердегі вахтерлердің орнына кәсіби күзет ұйымдары енгізілгенімен, жағдай айтарлықтай өзгерген жоқ. Бұл туралы Мәжіліс депутаты Асхат Аймағамбетов мәлімдеді, деп хабарлайды Dalanews.kz.

“Расында, жасы келген адамдар төтенше жағдайда дұрыс әрекет ете алмайды дедік. Бірақ… не өзгерді? Ашығын айтқанда — ештеңе. "Вахтер" деген сөзді "күзетшіге" ауыстырдық, ал іс жүзінде көбіне — сол баяғы адамдар. Көп жағдайда – жасы алпыстан асқан апа-аталар. Кейде тіпті бұрынғы вахтерлерден де алшақ, мектептің ішкі өмірінен бейхабар” – деді депутат.

Аймағамбетовтың айтуынша, бұл мәселенің басты себебі – қаржы тапшылығы. Тендерді ең төмен баға ұсынған компаниялар жеңіп алады, ал олар кәсіби дайындықтан өтпеген адамдарды жұмысқа орналастырады.

“Олар мұғалімдерді танымайды, мектеп режимін білмейді, оқушылармен қалай сөйлесу керек екенін де түсінбейді. Мектеп – жай ғана ғимарат емес, бұл — балаларымыздың екінші үйі. Ал оны қорғау – жай ғана “отыр” дей салатын жұмыс емес” – деп атап өтті Аймағамбетов.

Оның пікірінше, күзет ұйымдарына қойылатын талаптар тым әлсіз. Қызметкерлердің жасы, денсаулығы, кәсіби дайындығы бойынша нақты талаптар жоқ. Сонымен қатар мектептерде күзетшілердің саны да жеткіліксіз.

Осыған байланысты депутат бірнеше нақты ұсыныс айтты:

1. Күзет ұйымдарына қойылатын лицензиялық талаптарды күшейту– жасы, білімі, дайындығы нақты көрсетілуі керек.

2. Ел бойынша бірыңғай стандарт қабылдау– Ішкі істер министрлігі мектеп күзетінің ортақ стандартын бекітуі тиіс.

3. Күзет посттарының нақты нормативін белгілеу– мектептің көлемі мен оқушы санына қарай күзетшілердің санын анықтау қажет.

4. Сатып алу тетіктерін жетілдіру– тек ең төмен баға ұсынған ұйымдарды емес, сапалы қызмет көрсететін компанияларды таңдау жүйесін қарастыру керек.

Аймағамбетов бұл мәселеде Ішкі істер министрлігі мен жауапты органдардың белсенді әрекет етуі қажет екенін баса айтты.