Мәжіліс депутаты Бақытжан Базарбек палатаның жалпы отырысында сот жүйесіндегі бірқатар өзекті мәселелерді көтерді, деп хабарлайды Dalanews.kz.

Оның айтуынша, заңды күшіне енген сот шешімдері тиісті деңгейде орындалмай келеді. Бұл мәселені түбегейлі шешу үшін заңнаманы жетілдіріп, қоғамның қазіргі қажеттіліктеріне сай өзгерістер енгізу қажет.

"Мен Мәжілістің қабылдау бөлмесінде бір күнде 160-тан астам азаматты қабылдадым. Бұл – халықтың Парламентке сенім білдіретінін көрсетеді. Бірақ жергілікті деңгейде шешілуі тиіс мәселелердің орталыққа дейін жетуі – жергілікті билік органдарының жұмысында олқылықтар барын аңғартады", – деді депутат.

Оның пікірінше, мұндай жағдайларды болдырмау үшін жергілікті атқарушы органдардың жауапкершілігін күшейту қажет. Сонымен қатар, сот жүйесі әділдік пен ақиқаттың, ең бастысы, азаматтардың құқықтарын жан-жақты қорғайтын институтқа айналуы тиіс.

"Әзірге бұл мақсат толық орындалмай отыр. Тағы бір түйткіл – қоғамда мәселелерді «шешіп беруге" маманданған делдалдардың, яғни "помогайкалардың" көбеюі. Мұндай әрекеттерге заң аясында қатаң тосқауыл қою керек», – деді Бақытжан Базарбек.

Айта кетейік, Мәжілістің бүгінгі отырысында Президент Қасым-Жомарт Тоқаевтың саяси реформалары талқыланып жатыр. Жиынға депутаттармен қатар ғалымдар, сарапшылар және БАҚ өкілдері де қатысуда.