Президент Қасым-Жомарт Тоқаев Қазақстан Республикасы Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда сөз сөйледі,- деп хабарлайды Dalanews.kz

Мемлекет басшысы Конституцияның еліміздің тәуелсіздігі мен мемлекеттілігінің негізгі тірегіне айналғанын атап өтті.

– Осыдан 30 жыл бұрын бүкілхалықтық референдумда Қазақстан Республикасының Конституциясы қабылданды. Бұл – егемен еліміз үшін тарихи сәт болды. Шын мәнінде, Ата заңнан биік ештеңе жоқ. Конституция – мемлекеттігіміздің мызғымас тұғыры, Тәуелсіздігіміздің айнымас темірқазығы, – деді Президент.

Тоқаев қазақ халқының құқықтық дәстүрлеріне де тоқталды. Оның айтуынша, Қасым ханның қасқа жолы, Есім ханның ескі жолы, Әз Тәукенің «Жеті жарғысы» – дала заңдарының жарқын үлгілері, ал қазіргі Конституция сол тарихи сабақтастықтың заңды жалғасы болып табылады.

Президент XX ғасыр басындағы қазақ зиялыларының құқық саласына қосқан үлесін, сондай-ақ кеңес заманында қалыптасқан заңгерлер мектебін де атап өтті.

Конференция барысында елдің құқықтық дамуындағы Конституцияның рөлі және болашаққа қатысты басым бағыттар талқыланды.