Қазақстандық "Сейф-Ломбард" ЖШС-ның құрылтайшысы, ресейлік банкир Игорь Ким Ұлыбританияның өзіне салған санкцияларына байланысты аталған компаниядағы өз үлесінен бас тартпақ. ЖШС-ның ол мажоритарлық акционері болып табылады, деп хабарлайды Dalanews.kz.
"2025 жылы 24 ақпанда" Сейф-Ломбард" ЖШС-ның бенефициарлық меншік иесі Ұлыбританияның (ЕО) санкциялар тізіміне енді. Санкциялық тәуекелдерді жою үшін компанияның құрылтайшысы Қазақстан Республикасының заңнамасына сәйкес өз үлесін иеліктен шығару туралы шешім қабылдады", деп хабарлайды Forbes.kz компания баспасөз қызметіне сілтеме жасап.
Игорь Ким "Сейф-Ломбард" ЖШС-нің бенефициары болып табылады, 2024 жылғы 30 қыркүйектегі жағдай бойынша оның үлесі 98,988%-ды құрайды. 1,012% - шағын пакет басқарма төрағасы, резидент Геннадий Кимге тиесілі. Мажоритарий өз үлесін қандай шарттармен және кімге беретінін, компаниядағылар нақтыламады.
"Сейф-Ломбард" хабарламасында компанияның өзі Ұлыбританияның санкциялар тізіміне ілінбегені және 2024 жыл бойынша 4,7 млрд теңге пайда табады деп күтілетіні көрсетілген.
Естеріңізге сала кетейік, Игорь Ким ресейлік Экспобанктің иесі ретінде 2025 жылдың 24 ақпанында Ұлыбританияның санкциялар тізіміне енді. Қазақстанда оған "Береке" микроқаржылық ұйымы да тиесілі. Ол оған 2023 жылдың соңынан бастап (бұрын — "Сейф-Ломбард"арқылы) жекелей өзі иелік етеді. 2023 жылдың желтоқсанында кәсіпкер бұл компанияны банкке айналдыру жоспары барын айтқан.
Бұған дейін сайтымызда "Қай қазақстандық компаниялар ЕО санкциясына ұшырағаны белгілі болды" деген мақала жарияланған. Мақалада санкциялар тізімінде Ресейдегі Экспобанктің қожайыны Игорь Ким де жүргені, ол Қазақстандағы "Береке" микро қаржылық ұйымның (МҚҰ) жалғыз акционері болып табылатыны айтылған.
