Денсаулық сақтау министрі Ақмарал Әлназарова Әлеуметтік медициналық сақтандыру қорының (ӘМСҚ) төрағасы Айдын Құлсейітовтің қызметтен кетуіне қатысты түсініктеме берді, деп хабарлайды Dalanews.kz.

Министрдің айтуынша, Құлсейітовтің отставкасы министрлікпен келісілмеген шешімдерге байланысты болған.

“Бұл шешім ӘМСҚ директорлар кеңесінің тарапынан қабылданған. Бірақ бір ғана акционер – Денсаулық сақтау министрлігімен келіспеген еді”, – деді Әлназарова.

Министр атап өткендей, мәселе негізінен қызметкерлердің және директорлар кеңесінің мүшелерінің айлығын арттыру, корпоративтік хатшының жалақысын көтеру және сыйақы енгізу сияқты шешімдерге қатысты болған. Дегенмен бұл әрекет жалақы қорының күрт өсуіне әкеп соққан, сондықтан министрлік біртұтас шешім қабылдауға тырысқанымен, келісімге келе алмаған. Нәтижесінде, біртұтас акционердің шешімімен директорлар кеңесінің шешімі жойылған.

“Бұл жағдай қарапайым болып көрінгенімен, жүйеде айтарлықтай қиындық туғызды. Қоғамның ӘМСҚ жүйесіне қатысты сұрақтары бар екенін білеміз, оларды толық ескереміз. Былтыр және биыл міндетті әлеуметтік медициналық сақтандыру заңын жетілдіру жұмыстары жүргізілді. Біз депутаттар мен халықтың ұсыныстарын назарға ала отырып, медициналық көмекті қолжетімді әрі сапалы етуге, медициналық қызметкерлерді ынталандыруға күш саламыз”, – деді Әлназарова.

Министрдің айтуынша, ӘМСҚ жүйесі – күрделі әрі сезімтал құрылым, онда 300 мыңнан астам медициналық қызметкер және 20 миллионға жуық тұтынушы қамтылған. 3 миллионнан астам адам диспансерлік есепте, сондай-ақ амбулаторлық дәрі-дәрмекпен қамтамасыз етілетіндер саны да көп. Сондықтан жүйені жетілдіру барысында емханалық қызмет көрсету сапасы, дәрі-дәрмекпен қамтамасыз ету және медициналық кадрларды ынталандыру мәселелері басты назарда болады деп ескертті министрлік.