ХХІ ғасыр – ұлттар арасындағы бәсеке заманы. Бұл – тек экономикалық немесе әскери қуатқа емес, ең алдымен, ұлттық бірегейлік пен сапалы қоғамға негізделетін жаңа дәуір. Қазақстан бұл өзгерістерге бейжай қарамай, уақыт талабына сай тың стратегиялық бағыттар ұстануда. Бұл жөнінде ҚР Парламенті Сенатының Төрағасы Мәулен Әшімбаев авторлық мақаласында жан-жақты баяндады,- деп хабарлайды Dalanews.kz
Ол Президент Қасым-Жомарт Тоқаевтың бастамаларына сүйене отырып, қазіргі заманғы ұлттық жаңғыруды «Қазақ ренессансы» деп сипаттайды.
2022 жыл – Қазақстан үшін ерекше кезең. Әшімбаевтың айтуынша, бұл жыл елдің санасын сілкінтіп, жаңаша ойлауға түрткі болған межелі уақыт болды. Бүгінгі күрделі геосаяси жағдайда ұлттық бірегейлікке қауіп төндіретін үдерістер көбейіп отыр. Көптеген елдерде бұл дағдарыс ұлтшылдық, ксенофобия, радикализм, оқшаулануға әкелсе, Қазақстан Президент Тоқаевтың бастамасымен өзгеше жолды таңдады – этномәдени интеграция, құқық пен бостандықты құрметтеу, жаңғырған ұлттық сана арқылы ұлтты біріктіру.
Мемлекет басшысының негізгі идеясы – «Ұлттың жаңа сапасын қалыптастыру». Бұл тек экономикалық көрсеткіштер емес, қоғамдық сана, құндылықтар жүйесі мен мәдени кодты жаңарту деген сөз. Мәулен Әшімбаевтың пікірінше, Тоқаев реформалары – «Қазақ ренессансының» қозғаушы күші. Олар білім, ғылым, мәдениет, еңбек және цифрлық дағдылар арқылы «смарт-ұлтты» тәрбиелеуге бағытталған.
Президент Тоқаевтың «Адал азамат» тұжырымдамасы – бұл ренессанстың іргетасы. Заң үстемдігі, ашықтық, азаматтық жауапкершілік – бүгінгі Қазақстан азаматының бейнесіне айналуы тиіс. Бұл принциптер арқылы әділетті қоғам мен бәсекеге қабілетті мемлекеттің негізі қалануда.
«Қазақ ренессансы» дәстүр мен заманауи үдерістердің синтезінен тұрады. Әшімбаевтың айтуынша, бұл – Наурызды тойлау, этностильге сұраныс, ұлттық тағамдар мен халық аспаптарына бетбұрыс секілді көріністерден басталады. Қазақ тіліне деген сұраныстың артуы – бірегейліктің тірегі ретіндегі рөлін арттырып келеді. Бұл – мәдениеттің жаңаруы ғана емес, ұлттық өзіндік сананың жаңғыруы.
«Смарт-ұлт» – бұл бүгінгі емес, болашақ ұрпаққа арналған бағдар. Ол – технологияны меңгерген, терең білімді, креативті және әлеуметтік жауапты азаматтардан тұратын қоғам. Президент Тоқаев цифрлық трансформацияны идеологиялық деңгейге көтеріп отыр. Мәулен Әшімбаев осы тұжырымды кеңейтіп, смарт-ұлт тек цифрлық сауат емес, инклюзивтілік, экологиялық мәдениет, этикалық жаңғыру екенін атап өтеді.
Қазақстанда бұл бағыттағы нақты қадамдар жасалып жатыр:
– «Цифрлық Қазақстан» бағдарламасы;
– «Ақылды қалалар»;
– IT-білім беру;
– Astana Hub экожүйесі;
– Жастардың халықаралық жетістіктері (мысалы, 8 жасар Алиша Бисалиеваның әлем чемпионы атануы).
Мақаланың соңында Әшімбаев тарихты тек өткеннің сабағы емес, болашаққа бастайтын ұлы процесс ретінде сипаттайды. Ол Сұлтан Бейбарыстың бейнесін келтіре отырып, «жусан иісін» ұмытпаған ұлттың арманын, рухани қуатын еске салады. Бұл символика – қазақтың жаһандық сахнада өз орнын табуға деген сенімі мен батылдығын білдіреді.
