Тараптар әңгімелесу барысында екі ел арасындағы туризм мен өзара әріптестік қарым-қатынас туралы пікірлесіп, ой бөлісті. Түркістан облысының әкімі АҚШ Қазақстанның халықаралық аренадағы жетекші серіктестерінің бірі екенін атап өтті.
– Біз үшін АҚШ – сенімді серіктес. Пандемияға қарамастан Түркістан облысында жұмыстар тоқтаған емес. Инвестициялар тартып, жаңа, заманауи жобаларды іске асыру үшін инвесторларға аса қолайлы жағдай жасауға ерекше назар аударылады. Туризмнің барлық бағыты біз үшін үлкен басымдыққа ие. Қонақ үйлер, ойын-сауық кешендері, туристерге қызмет көрсету, жеңіл өнеркәсіп, машина жасау, химиялық өндіріс, қайта өңдеу, ауыл шаруашылығы сынды бағыттарда сенімді серіктес болуға ашықпыз, – деді Өмірзақ Шөкеев.
Өмірзақ Шөкеев ірі америкалық компаниялардың агроөнеркәсіптік сектордағы жобаларын жүзеге асырудың перспективалығын атап өтті. Түркістан өңірінің нарығына шыққан шетелдік компанияларының мүмкіндігіне тоқталды. Өз кезегінде, У. Мозер инвестициялық ахуалды жақсарту тәсілдерін жоғары бағалап, америкалық тараптың ынтымақтастықты қолданыстағы форматта жалғастыруға дайын екенін жеткізді.
– Кезінде Қазақстанның жаңа астанасының салынуының куәсі болған едім, енді міне, рухани астананың қарыштап дамуын көріп, керемет әсер алдым. Сол уақыттағы Астана осындай болатын. Түркістанның санаулы уақыттан кейін қандай болып өзгеретінін көз алдыма елестеттім. Туризм саласы инвесторларды қызықтырады деп ойлаймын. Және жолда келе жатып, біздің технологияны Түркістан аумағында пайданатындарыңызды көрдім. Жаңбырлатып суару – өте тиімді әдіс, әсіресе жергілікті климат үшін таптырмас тәсіл. Мұндайда ағаштардың көгеруінің қаншалықты қиын екенін жақсы түсінемін. Өте аз уақытта көп жұмыстар атқарылған екен. Адамдар игілігі үшін атқарылып жатқан оң істер көрініп тұр, – деді АҚШ Елшісі.
Шетелдік делегация Түркістан өңірі мен облыс орталығының болашақ экономикалық даму бағытына оң баға беріп, аймақтың алдағы жылғы даму тұжырымдамасындағы бірқатар жобаларға қызығушылық танытты. Қазақ ұлттық мәдениетінің ең байырғы, аса құнды салаларының бірі – қолөнеріне қызығушылық танытты. Тараптар екі ел халықтарының игілігі үшін барлық бағыттар бойынша екі жақты ынтымақтастықты одан әрі нығайтуға ниетті.
