Биылғы жартыжылдықта жоғары көрсеткіштерге қол жеткізген облыста Бесқарағай ауданының үлесі де бар. Ауданда тау-кен өнеркәсібі саласында «ГРК Электрум», «Семей Орда», «Қазникель» өңдеу өнеркәсібінде «Лесресурс» жауапкершілігі шектеулі серіктестіктері жұмыс жасайды.
– Агроөнеркәсіп кешені биылғы алты айда 22,2 пайызға өсті. Осы кезең ішінде өнеркәсіпте өндірілген 670 млрд теңгеден астам өнім көлемінің 870,7 млн. теңгесі Бесқарағай ауданына тиесілі. Сонымен қатар облысқа тартылған 230 млрд теңге шамасындағы инвестиция көлемінің 2,6 млрд теңгесі де ауданның үлесіне тиіп отыр. Қазіргі көрсеткіш бойынша инвестиция тартудан облыстағы өсім 154,2%-ды құрайды, – деді облыс басшысы.
Бесқарағай ауданында жағажай және емдік-сауықтыру туризмін дамытудың әлеуеті зор. Шипалы «Шошқалы» көлінен басқа, «Святой ключ» орны, «Елімай» демалыс базасы, «Жас қанат», «Радуга» балаларды сауықтыру лагерлері орналасқан. Сондықтан бұл жерде туризм және сауықтыру бағытында жүйелі жұмыстар қажет.
– Бірінші жарты жылдықта облыс тұрғындары 130 мың шаршы метрден астам тұрғын үйге қоныстанды. Бесқарағай тұрғындарының игілігіне 2 мыңнан астам шаршы метр тұрғын үй берілді. «Ауылдық денсаулық сақтауды жаңғырту» пилоттық жобасы шеңберінде 65 медициналық нысан салу жоспарланған. Аудандық ауруханаға медициналық техниканы сатып алуға 45,4 млн теңге қарастырылып отыр.
«Ауыл – ел бесігі» жобасы аясында 511 млн. теңгеге 4 мәдениет мекемесін қайта жаңартып, жөндеу жұмыстарын жүргізу жоспарланған. Сондай-ақ аудандық мәдениет үйінің ғимаратын ағымдағы жөндеуге облыстық бюджеттен 55,7 млн. теңге бөлінді, – деп атап өтті Нұрлан Ұранхаев.
Облыста оқушы орынының тапшылығы мәселесі бар. Орын тапшылығын «Жайлы мектеп» ұлттық жобасы аясында 5700 орындық 11 мектеп салу және 2100 орындық 6 мектепке қосымша құрылыс жүргізу арқылы шешу жоспарланған.
Былтыр 1700 орынға арналған 4 мектеп пайдалануға берілген. Оның қатарында Бесқарағай ауданының Жыланды ауылындағы мектеп те бар.
Аудандағы кейбір білім беру мекемелерін салу, жөндеу жұмыстарын жүргізу, модификацияланған кабинеттерді сатып алуға бағытталған шаралар облысты дамытудың 2026 жылға дейінгі кешенді жоспарына енгізілген.
Кездесуден кейін облыс басшысы Бесқарағай ауданының тұрғындарымен жеке қабылдау өткізіп, сұрақтарына жауап берді.
